«Իրատես». Սկսվել է ՀՀԿ-ի ռեբրենդինգի գործընթացը. ովքե՞ր են լինելու խաղացողները

«Իրատես» թերթը գրում է.

«Հանրապետական» կուսակցության գործադիր մարմնի օրերս տեղի ունեցած հերթական նիստի ժամանակ ծավալուն անդրադարձ է եղել կուսակցության ներկայացուցչական տեսքը փոփոխելուն: ՀՀԿ-ն, ըստ երևույթին, ականջալուր է եղել կուսակցությունը ռեբրենդինգի ենթարկելու քաղաքագետների հայտարարություններին և որոշել հին դեմքերին փոխարինել քաղաքական մաքուր էջ ունեցող երիտասարդներով:

Մեր տեղեկություններով՝ հիմնական խաղացողներին ՀՀԿ-ն Անդրանիկ Մարգարյանի անվան քաղաքական դպրոցից է ընտրելու:

«Այնպես չէ, որ ընտրությունը շատ մեծ է, ու այդ դպրոցում շատ են դեմքերը, որոնք կարող են ներկայանալի լինել հասարակությանը, բայց կարող ուժեր, իհարկե կան: Ոմանց արդեն առաջարկ եղել է կամաց-կամաց խաղի մեջ մտնելու: Համաձայնողներ եղել են»,- «Իրատեսին» ասաց դպրոցի սաներից մեկը:

Մեր զրուցակցի փոխանցմամբ՝ քաղաքական դպրոց հաճախողների թիվը նվազել է իշխանափոխությունից հետո, շատերն անգամ դադարեցրել են իրենց անդամակցությունը կուսակցությանը, բայց ՀՀԿ-ի գաղափարախոսությանը անվերապահորեն հետևողները պատրաստ են ներկայանալու բոլորովին նոր կերպարով ու ասելիքով»:

Մանրամասները՝ թերթի այսօրվա համարում