Կովերի կաթնատվությո՞ւնն էլ է կախված արտահերթ ընտրություններից. Սպարտակ Սեյրանյան

Մինչև հիմա որևէ քաղաքական հիմնավորում չեմ տեսել, թե ինչու արտահերթ ընտրությունը պետք է լինի հրատապ: Լրագրողների հետ զրույցում այդ մասին ասաց Հայ Յեղափոխական Դաշնակցություն խմբակցության պատգամավոր Սպարտակ Սեյրանյանը: Նրա համոզմամբ՝ կառավարության որոշ անդամների կողմից բերված փաստարկները համոզիչ չեն:

«Մարդիկ գիշերները չեն կարողանում քնել, քանի որ արտահերթ խորհրդարանական ընտրություն չի եղել, մարդիկ փողի պարկերով սպասում են, թե երբ պետք է արտահերթ ընտրություններ տեղի ունենան, որպեսզի ներդում անեն, կամ, ինչպես Սփյուռքի նախարարն է ասում, սփյուռքահայերը սպասում են` տները գտել են, ընտրել են, տերերի հետ էլ պայմանավորվել են, բայց բնակարաններ չեն գնում, քանի որ արտահերթ ընտրություններ չեն կայացել... ես չեմ շարունակի այս տրամաբանությունը՝ ասելով, որ կովերի կաթնատվությունը, բերքատվությունը, ձյան քանակը, ամռան շոգերը և այլն նույնպես կախված է խորհրդարանական ընտրությունների հրատապ անցկացումից»,-ասաց պատգամավորը:

Նա նկատում է, որ քաղաքական ուժերը պետք է հստակ կարողանան ձևակերպել, թե ինչո՞ւ են ուզում, որ արտահերթ ընտրությունները շուտ լինեն:

«Եթե, կարողանա ասել, հոդաբաշխ, տրամաբանված ասել՝ ինչու, ենթադրենք, հունվարի 20-ին, ոչ թե դեկտեմբերի 10-ին, և ոչ թե կամակոր երեխայի նման՝ ուզում եմ, ուզում եմ, ուզում եմ, ապա ես մեծ հաճույքով կքննարկեի, կփորձեի հասկանալ դրա տրամաբանությունը»,- ասաց նա:

ՀՅԴ պատգամավորը նշեց, որ ամեն դեպքում, հանրության կարծիքը կարևոր է. «Ամեն դեպքում, ինչպես ասում են՝ ձայն բազմաց, ձայն Աստծո, եթե հասարակությունը գտնում է, որ մեր բոլոր այդ դժբախտությունների պատճառն արտահերթ խորհրդարանական ընտրությունները թեկուզ մեկ շաբաթով հետաձգելու մեջ կլինի, Աստծո սիրուն, մեկ շաբաթ առաջ կանենք, որպեսզի ներդրողները ներդում անեն, մնացած խնդիրներն էլ ավելի արդյունավետ լուծվեն»,-ասաց նա: