Առավոտյան 10-ին ինձ զանգեց Փաշինյանը, ասաց՝ իրավիճակ է փոխվել. Բաղդասարյանը մանրամասնում է հոկտեմբերի 1-2-ի դեպքերը

Իմ և Նիկոլ Փաշինյանի հանդիպումից հետո, ինձ համար անակնկալ եղավ Նիկոլ Փաշինյանի հայտարարությունը: Այդ մասին այսօր Ազգային ժողովում լրագրողների հետ ճեպազրույցում ասաց ԱԺ Հանրապետական խմբակցության ղեկավար Վահրամ Բաղդասարյանը՝ մանրամասն ներկայացնելով հոկտեմբերի 1-2-ի իրադարձությունները: 

«Ըստ պայմանավորվածության, Նիկոլ Փաշինյանի առաջարկությամբ, հոկտեմբերի 1-ին՝ ժամը 20:30-ին, մենք հանդիպեցինք «Մարիոթ» հյուրանոցում: Նաև այդ օրը ժամը 12:00-ին-ին մենք ունեինք խմբակցության նիստ, որտեղ քննարկում էինք մենք տեսակետները և որին անմիջապես հաջորդեց պետաիրավական հարցերով հանձնաժողովի նիստը: Եվ այդ օրենքը, որը մատի փաթաթան էր դարձել, վերաբերում էր սահմանադրական կարգի հաստատմանն ու պատգամավորների ազատ տեղաշարժին, քննարկվեց պետաիրավական հարցերի հանձնաժողովում: Ներկա է եղել նաև «Ելքի» ներկայացուցիչը: Քննարկումից հետո՝ դրական կարծիք տալուց հետո, երեկոյան մենք հանդիպել ենք պարոն Փաշինյանի հետ: Այդ մասին որևէ խոսակցություն չի ունեցել»,-  պատմեց Բաղդասարյանը:

Նրա համոզմամբ՝ Փաշինյանի ղեկավարած ուժի ներկայացուցիչները պետք է տեղյակ պահեին այդ մասին վարչապետին, սակայն չեն արել. «Այդ հարցի լավագույն քննարկման տեղը մեր հանդիպման ժամանակ էր, պետք է քննարկեինք: Ես չգիտեմ՝ ում շահերից է բխել, ես հավատում եմ, որ Նիկոլ Փաշինայնն իրազեկված չի եղել օրենսդրական նախաձեռնության մասին, որ այդ պահին չմատուցեն, և առավոտյան այլ ձևերով մատուցեն»:

Բաղդասարյանը ներկայացրեց, որ այդ օրն իրենց հանդիպումը ստացվել է՝ չնայած այն բանին, որ ունեցել են տարբեր կարծիքներ, բայց եկել են ընդհանուր հայտարարի, որ պետք է ապագա հանդիպումների ֆորմատը որոշեն, պետք է հանդիպում լինի նաև մյուս քաղաքական ուժերի հետ, խմբակցությունների հետ, որից հետո իրենք պետք է հավաքվեն բոլոր խորհրդարանական ուժերով և անեն միասնական հայտարարություն:

«Խոսքը մայիս-հունիս ամիսներին միասնական, համերաշխ ձևով արտահերթ խորհրդարական ընտությունների անցկացման մասին էր: Ես ինձ վրա պատասխանատվություն վերցրի, որ եթե մենք գալիս ենք հայտարարի, պատրաստ ենք առանց ցնցումների գնալ արտահերթ խորհրդարանական ընտրությունների, եթե պետք լինի, անգամ փաստաթուղթ ստորագրել: Ես չէի ասի՝ վերջնական պայմանավորվածություն ձեռք բերվեց, բայց ընդհանուր մոտեցումն այն էր, որ մենք պետք է գնանք այդ ճանապարհով: Առավոտյան՝ 10:00-ի սահմաններում, ինձ զանգ եկավ պարոն Փաշինյանից, և պարոն Փաշինյանն ասաց, որ իրավիճակ է փոխել, այստեղ օրենք են բերել, մենք պետք է նորից հանդիպենք, և ես խնդրում եմ, որ այդ օրենքը քվեարկության չդրվի, հակառակ դեպքում՝ ինքը կմտնի ուղիղ եթեր և ժողովրդին կհրավիրի Ազգային ժողով»:

Բաղդասարյանն ասել է, որ այդ մասին իրենք կարող էին խոսել նախօրեին, Փաշինյանն էլ պատասխանել է, թե՝ իրեն տեղյակ պահած չեն եղել, ինքը նոր է միայն իրազեկվել և առաջարկել է քվեարությունը հետաձգվի, իրենք ևս մեկ անգամ հանդիպեն: 

«Ես պարոն Փաշինայնին ասացի, որ ոչ միայն այսօր հանդիպենք, այլև հնարավորություն ստեղծենք հանդիպել մյուս քաղաքական ուժերի հետ, հենց այսօր հավաքվենք բոլոր քաղաքական ուժերով և հայտարարություն տարածենք: Հետո նորից զանգեց, ժամադրություն նշանակեց՝ 16:45-ին: Պարոն Փաշինյանն ու Արարատ Միրզոյանը եկան հանդիպման»,- պատմեց Բաղդասարյանն ու հավելեց, որ Փաշինյանը եկել էր իրազեկելու, որ ինքը միանձնյա որոշել է, որ պետք է գնալ արտահերթ ընտրությունների դեկտեմբերին:  

Բաղդասարյանը Փաշինյանին հիշեցրել է պայմանավորվածությունը, ասել, որ եթե պետք է՝ օրենքը հաջորդ օրը նույնպես չեն դնի քվեարկության: Փաշինյանը, սակայն պնդել է՝ իր որոշումը վերջնական է՝ դեկտեմբերի պետք է գնալ արտահերթ ընտրությունների: «Ես ասացի, որ այդ պահին ես դեկտեմբերի համար պատասխանատվություն չեմ վերցնում: Այսինքն՝ դա Փաշինյանի կողմից վերջնագիր էր՝ դեկտեմբերին պիտի գնայինք ընտրությունների: Քվեարկությունը մենք հետաձգել էինք, որպեզի քննարկման գնանք, բայց պատկերն այլ դարձավ, և որոշում կայացվեց հրավիրել արտահերթ նիստ: Դրանից հետոն դուք տեսաք»: