«Քնում եմ վախով, որ գիշերը մահճակալի հետ կհայտնվեմ խորը փոսում»․ խայտառակություն Արամի փողոցում (լուսանկարներ)

Մաթևոսյան Սուրենի սենյակը նման է սարսափ ֆիլմերի տներին։ Սենյակի պատերի ճաքերը 1-2 սանտիմետր կլինեն։ Քնում է վախով, որ միգուցե գիշերը մահճակալի հետ մեկտեղ կընկնի խորն ու հսկա փոսը։ Այսպիսին է ներկայիս Արամի փողոցը։

Ինչպես Սուրենն է ասում՝ «Պիտի պարտադիր մարդ մահանա, որ նոր էս հարցը ուշադրության կենտրոնում լինի»։

NEWSPRESS.am-ը շատ անգամներ է անդրադարձել Արամի փողոցում մնացած ընտանիքներին, ովքեր մինչ օրս դեռ այնտեղ են, քանի որ շինարարություն իրականացնողները չեն վճարում այն գումարը, որին իրոք արժանի են այդ տարածքի բնակարանները։ Մեզ հետ զրույցում Սուրենը, մասնավորապես, նշեց․

«Շինարարությունից առաջ ոչ ոք չի եկել։ Առաջարկ արել են, հարց ու փորձ արել են ու ուզում էին պարզել, թե ով ինչ է ցանկանում։ Երբ սկսեցին քանդել, չգիտեինք, որ սենց բան է լինելու, որ իմանայինք՝ չէինք թողնի, քանի որ պատից մեկ մետր հեռու քանդած է։ Կարծում եմ, որ հենց մտածված են արել, որ ուզած-չուզած՝ քանդվի, թողնենք ու գնանք։ Օգոստոսին առաջարկեցին 1000 դոլար մեկ քառակուսի մետրի համար, բայց էս տեղն էն տեղը չի, որ էդ փողը տան։ Ոնց որ մարդուն ձեռք առնեն։ Էդ գումարով ուզում ենք շրջակայքում մի նորմալ տուն առնենք»։

Ս․ Մաթևոսյանը նշեց, որ այս ճաքերը սկսեցին առաջանալ քանդելուց հետո։ Իսկ քանդման աշխատանքները սկսվեցին փետրվար ամսին։

«Մարտից սկսեցին պատերը ճաքել։ Սկզբում բարակ գիծ էր, ոնց որ մատիտով գծած լիներ, բայց հիմա մի քանի սանտիմետրանոց ճաք է ու ամեն օր մեծանում է։ Ամեն օր ճաքում է էս պատը ու մի օր հաստատ կպոկվի ու տունը կընկնի ներքև։ Տան պատերից մեկը ճաքելիս գմփաց։ Գիշերները ձայն ենք լսում, արթնանում ենք ու էլ չենք կարողանում  քնել։ Ցերեկով գոնե կարող ենք փախչել, իսկ գիշերով մահճակալի հետ ընկնելու ենք ներքև»։

Ընդգծենք, որ տարածքում մնացած մի քանի ընտանիքները մինչ օսր սպասում են, որ իրենց առաջարկեն «ոչ ծիծաղելի» գումար։ Բնակիչները տեսակետ են նաև առաջ քաշում, որ միգուցե այս ծրագիրն իրականացնող կազմակերպությունը գումարները «կերել է», այդ իսկ պատճառով հիմա քառակուսի մետրի համար առաջարկում են շատ ցածր գումար։