Դուք Ձեր մեջ ավելի շատ տեսնում եք վարչապետի՞, թե՞ հանրահավաքի ղեկավարի. Դաշնակցական պատգամավորի հարցը՝ Փաշինյանին

«Վարսավիրը սափրում է գյուղում ապրող այն մարդկանց, ովքեր իրենք իրենց չեն սափրում, հարց՝ այդ վարսավիրն ինքն իրեն սափրո՞ւմ է, թե՞ ոչ: Եթե վարսավիրն իրեն սափրում է, ապա ինքն իրեն չպետք է սափրի, եթե վարսավիրն ինքն իրեն չի սափրում, ապա, ըստ կանոնի, պետք է ինքն իրեն սափրի, ստացվում է հակասություն»:

Ազգային ժողովում կառավարության հետ հարցուպատասխանի ժամանակ, բերելով այս խնդրի օրինակը, ՀՅԴ խմբակցության պատգամավոր Արմենուհի Կյուրեղյանը դիմեց վարչապետ Նիկոլ Փաշինյանին: 

«Նման հակասության խնդիր ես ինքս ինձ համար ձևակերպեցի Երևանի ավագանու ընտրություններում. «Իմ քայլը» դաշինքի քարոզարշավում Դավիթաշեն վարչական շրջանում ելույթ էր ունենում վարչապետ Նիկոլ Փաշինյանը կամ Նիկոլ Փաշինյանը: Հիմա եթե որպես վարչապետ Նիկոլ Փաշինյան էր նա ելույթ ունենում, ապա դա չի՞ դիտվելու որպես պաշտոնի չարաշահում, իսկ եթե ինքը ելույթ էր ունենում որպես ՔՊ կուսակցության նախագահ, ապա ինչպե՞ս էր նա այդ հարթակից հրահանգ իջեցնում»,- ասաց Կյուրեղյանը՝ մեջբերով Փաշինյանի հայտնի հրահանգն ԱԱԾ-ին և ոստիկանապետին՝ օլիգարխներին ու բարձրաստիճան պաշտոնյաներին «ասֆալտին պառկեցնելու» մասին: 

Եզրափակելով՝ Կյուրեղյանը հարցրեց Փաշինյանին, թե այդ պահին ինքը հարթակում վարչապե՞տ Նիկոլ Փաշինյանն էր, թե ՔՊ կուսակցության ղեկավար Նիկոլ Փաշինյանը:

Նախ, հարցը որակելով որպես ոչ միամիտ, Փաշինյանն ասաց, որ միամիտ պատասխան կտա և կարճ պատասխան տվեց՝ պարզապես Նիկոլ Փաշինյանն էր: 

Արձագանքելով՝ Արմենուհի Կյուրեղյանը կրկնեց՝ պատասխանել վերը բարձրացրած իր երկու հարցին՝ եթե... ապա..., և եթե... ապա...: Նա ևս մեկ հավելում արեց. «Վերջերս հանրության մի մասի մոտ կարծիք կա, որ Դուք շատ արագ կերպարանափոխվում եք վարչապետից մինչև հանրահավաքի ղեկավարի: Բնականաբար, Ձեր կերպարի մեջ շատերը կուզեին տեսնել վարչապետի, քան հանրահավաքի ղեկավարի: Դուք՝ ինքներդ, Ձեր մեջ քանի տոկոս եք տեսնում վարչապետ, քանի՞ տոկոս՝  հանրահավաքի ղեկավար: Միայն թե, չասեք՝ հավասար, կամ ավելի շատ վարչապետ, որովհետև, մեղմ ասած, անազնիվ կլինի»,- ասաց Կյուրեղյանը:

Ի պատասխան՝ Փաշինյանն ասաց, որ Հայաստանում կան քաղաքական ուժեր, որոնք ավելի արագ են կերպարանափոխվում և ավելի մեծ ամպլիտուդներով. «Իսկ, ընդհանուր առմամբ, կարող եմ ասել, որ ես, սովորաբար, իմ դիրքորոշումներում, ասելիքներում ու անելիքներում սիրում եմ լինել համարժեք և, տվյալ դեպքում, կարող եմ ասել, որ ես Ձեր հարցին պատասխանեցի: Ես հիմա էլ եմ Նիկոլ Փաշինյանը, և այն, ինչ որ այստեղից ասում եմ, կարող եմ ասել նաև հանրահավաքում, գուցե մի քիչ ավելի բարձր, որ վերջին շարքերում լսելի լինի: Ինչ վերաբերում է իմ ելույթին, ապա այնտեղ, որտեղ ես խոսել եմ որպես վարչապետ, ես խոսել եմ՝ որպես վարչապետ և այն, ինչ ես խոսել եմ որպես վարչապետ, չի վերաբերել նախընտրական քարոզչությանը: Ինչ վերաբերել է նախընտրական քարոզչությանը, ես խոսել եմ իբրև մի մարդ, որը կարող է խոսել նախընտրական քարոզչությանը»,- եզրափակեց Փաշինյանը: