Ձեռքերս արյունոտ չի․․․ Մենք սրանով բռնաբարում ենք Սահմանադրությունը․ Շարմազանով

«Ըստ Սահմանադրության՝ Հայաստանի Հանրապետությունն օրենսդիր մարմին է, և չի կարելի միջամտել ճնշումներով և սպառնալիքներով Ազգային ժողովի աշխատանքներին։ Մենք սրանով բռնաբարում ենք Սահմանադրությունը»։ Այս մասին լրագրողների հետ զրույցում ասաց ԱԺ փոխնախագահ Էդուարդ Շարմազանովը:

Նա ընդգծեց, որ որևէ մեկի մոտ տպավորություն չպետք է ստեղծվի, թե Շարմազանովը պաշտոնի կամ մանդատի կռիվ է անում:

Նա նկատեց, որ բացի պաշտոնական լիզորություններից, 8-10 տարվա մեջ շատ գործեր է արել, որոնց մասին կարող է հատ-հատ ասել: Շարմազանովը թվարկեց, թե ինչեր է արել և նշեց.

«Եթե մեկը սրա կեսի կեսն արել է, ես կասեմ՝ ապրեք.... Ո՛չ ձեռքերս արյունոտ ա, ո՛չ գրպանս ուրիշի փող կա, ո՛չ մեկից փող եմ գողացել, ո՛չ էլ բյուջեից եմ փող գողացել, ո՛չ էլ էդ մանդատն ինձ տվել ա ինչ-որ լիազորություն, մանդատի կռիվ չի։ Հասկանալի ա, որ էսօր ես ինչ ասում եմ, լսելի չի մեծամասնության համար, բայց ես սա ասում եմ, որ վաղը չասեք՝ մի հատ սթափ մտածող մարդ չկար, որ ասեր՝ Ազգային ժողովի հետ չէր կարելի տենց վարվել։ Ես իմ խղճի համար եմ սա անում, թե չէ՝ մանդատ ունեն, մանդատ չունեն, ո՞վ ա մանդատի կռիվ տալիս։ Ես բանվորություն էլ եմ արել, իմ քրտինքով եմ հասել, ոչ մեկի տունը չեմ թալանել։ Վեց տեղ դաս եմ տվել, իմ ընտանիքը պահել եմ»,-ասաց Շարմազանովը:

Նա նկատեց, որ եթե մեկը այս 8-10 տարվա ընթացքում պետք է նեղանա իրենից, ապա դա իր ընտանիքն է, որ չի կարողացրել ժամանակ հատկացնել:

Ինչ վերաբերում է ԱԺ արտահերթ ընտրությունների հետ կապված բանակցություններին, ապա Շարմազանովը վստահեցնում է, որ խնդիրն իրենց մեջ չէ։

«Փաշինյանն այստեղ ուղիղ եթեր է մտել մոտ մեկ ամիս առաջ ու ասել,որ  ընտրությունները կլինեն մայիսի վերջ, հունիսի առաջին շրջանում, հիմա ի՞նչ եղավ»,-հարցրեց Շարմազանովը։

Հարցին, թե ինչո՞ւ է ՀՀԿ-ին անհանգստացնում վարչապետի կողմից նշված ժամանակահատվածը, Շարմազանովն ասաց, որ Ընտրական օրենսգիրք պետք է փոխվի, կուսակցությունների մասին օրենք պետք է փոխվի, և այդ փոփոխություններն էլ դեռ պետք է հաստատի Վենետիկի հանձնաժողովը։

Ընտրական օրենսգրքի փոփոխությունների հետ կապված դիտարկմանն էլ Շարմազանովն արձագանքեց․

«Ո՞ւր ա, եղե՞լ ա․ բա թողե՛ք անեն, կհասցնե՞ն, ինչի՞ չեն անում․ ընդունողը մենք ենք, ինքն ու Արարատ Միրզոյանը չեն»,- եզրափակեց Շարմազանովը։