Ուրիխանյանն իր դաշտին հարված ուղղեց՝ ժողովրդի ծափողջույնին արժանանալո՞ւ համար․ կներվի՞ դա նրան

Կա՞ր արդյոք հոկտեմբերի 2-ի երեկոյան ԱԺ արտահերթ նիստի անհրաժեշտություն, թե ոչ՝ առանձին պատմություն է, բայց որ բոլոր ներկա պատգամավորները տեղյակ էին, թե ինչ է քննարկման դրվելու և ինչի համար են քվեարկելու, ակնհայտ է։

Իզուր չէր ԵԼՔ խմբակցության ղեկավար Լենա Նազարյանը մինչև նիստն սկսվելը գողացել ԱԺ ՀՀԿ և «Ծառուկյան» խմբակցության պատգամավորների քվեարկության քարտերը, որպեսզի տապալվի քվեարկությունը, ու իզուր չէր վարչապետ Նիկոլ Փաշինյանը հավաքել մարդկանց ԱԺ բակում՝ տոտալ ճնշում գործադրելու օրենսդիրների վրա։

Այնպես որ՝ բոլորն ավելի քան քաջատեղյակ էին, թե ինչ նախագիծ է քննարկման դրվելու խորհրդարանում։

Այս ֆոնին զուր են Տիգրան Ուրիխանյանի՝ կաշվից դուրս գալու ճիգերն ու փորձերը՝ ապացուցելու, թե ինքը տեղյակ չէր՝ ինչի համար է տվել իր ձայնը։

Ասում են՝ «արջն ահից է գոռում»․ հիմա, ինչպես ասում են՝ «յոթ մոր կաթ կերած» ու հազար «երես փոխած», և ի վերջո՝ խորհրդարան մտնելու համար ԲՀԿ-ից գնացած ու նորից հետ եկած «Ծառուկյան» խմբակցության պատգամավոր Ուրիխանյանն ուզում է համոզել, թե իրեն ուրիշ թուղթ են «դեմ տվել» ու օգտագործել իր «այո»-ն։

Պատգամավորն անձամբ չի եկել ԱԺ, և, հավանաբար, մտածել է, թե երբ բացահայտվի նախագծի բովանդակությունը, պարզապես կասի, թե ինքն այնտեղ չի եղել և տեղյակ չի եղել կատարվածից։ Դրա համար էլ նա իր հերթական «ավանտյուրան» է մտածել։ Տիգրան Ուրիխանյանն իր ֆեյսբուքյան էջում արդարացել է, թե պատրաստվում է վայր դնել իր մանդատը և պահանջել ԱԺ լուծարումը, քանի որ ինքը «խաբված» է ԱԺ-ի կողմից։

Սակայն, ինչպես ասում են, եթե Ուրիխանյան Տիգրանն աղվեսն է՝ ԲՀԿ-ն պոչն է։

Վանիկ Էլիզբարյանը կուսակցության անունից հրապարակվել է փաստաթուղթ, որտեղ հստակ երևում է՝ պատգամավորը նախապես իմացել է օրենքի նախագծի կոդը և ճիշտ հղում կատարել (նախագծերը իրենց անձնական համարակալումը ստանում են միայն փոփոխություններն ու լրացումներն ամբողջական տեսքի բերվելուց հետո): Դա նշանակում է, որ քվեարկելիս Տիգրան Ուրիխանյանն ունեցել է հստակ ինֆորմացիա, թե ինչ կոդով և ինչ փաստաթղթով պետք է գրություն թողնի ԱԺ նախագահի մոտ:

Դե հիմա գնա՛ ու արդարացի՛ր, Տիգրան Ուրիխանյան, քանի որ և՛ շիշը վառվեց, և՛ խորովածը։

Ինչպե՞ս կվարվի Գագիկ Ծառուկյանն իր խմբակցության պատգամավորի իրարարամերժ տեսակետերի հետ՝ դեռ պարզ չէ․ ակնհայտ է միայն, որ քաղաքական դաշտում լավ խաղալու և հանդիսատեսի (տվյալ դեպքում՝ ժողովրդի) ծափողջույնին արժանանալու համար, խաղի ընթացքից կարող ես մի քանի անգամ գնդակը փոխել, և ոչ թե դաշտը։ Հակառակ դեպքում, անգամ հանդիսատեսը չի ների  ու չի ողջունի քո կողղմից քո իսկ դաշտին ուղղված հարվածը։