Սասուն Միքայելյանը «խելքը հացի հե՞տ է կերել». ինքն է՞լ է ուզում լուսանցքում հայտնվել

Ինչպես արդեն գրել էինք, օրերս հայտնի դարձավ, որ Ազգային ժողովի ԵԼՔ խմբակցության պատգամավոր Սասուն Միքայելյանի որդին՝ Սևակ Միքայելյանը, ինքնառաջադրվել է Հրազդանի քաղաքապետի պաշտոնի համար։

Մենք քննադատել էինք Սասուն Միքայելյանի այս որոշումը: Շեշտում եմ` Սասուն Միքայելյանի, քանի որ հստակ էր, որ Հրազդանի քաղաքապետի պաշտոնում առաջադրվելը եղել է ոչ թե կրտսեր, այլ՝ ավագ Միքայելյանի որոշումը։ 

Այսօր ՔՊ մամուլի խոսնակն իր ֆեյսբուքյան էջում նշեց, որ ՔՊ-ն նպատակահարմար չի գտնում պաշտպանել Հրազդանի քաղաքապետի արտահերթ ընտրություններում ինքնառաջադրված Սևակ Միքայելյանի թեկնածությունը:

Սա ՔՊ-ի մամուլի խոսնակի հերթական ցնդաբանություններից է, քանի որ՝ ինչպե՞ս կարող է ՔՊ-ն իր տարածքային կազմակերպության ղեկավարին չաջակցել: Եթե այդպես էր՝ Սևակ Միքայելյանը դրանից հետո չպետք է շարունակեր մնալ Հրազդանի ՔՊ կառույցի ղեկավարը. անմիջապես հրաժարական պետք է տար, իսկ քանի որ հրաժարական չի ներկայացրել, ուստի՝ տողատակն ավելի խորն է ու բովանդակալից։

Միգուցե Նիկոլ Փաշինյանը կանխել է Սևակ Միքայելյանի առաջադրումը, որից հետո անխուսափելի էր լինելու Հրազդան քաղաքի ընտրություններում 80 տոկոսը «խփելն» ու ժողովրդավարության հերն անիծելը․ չէ՞ որ այսկերպ Նիկոլ Փաշինյանը կփաստեր՝ ՀՀԿ-ից մի բան էլ ավել է․ նրանք ընտրություններին «խփում էին» 60-70, ինքն ու իր թիմը՝ 80 տոկոս։ 

Մյուս կողմից՝ ՔՊ-ականների այս որոշումը շատ անսպասելի էր, քանի որ, եթե Նիկոլ Փաշինյանն ի սկզբանե դեմ է եղել այդ որոշմանը, կարող էր նախապես կուսակցության վարչության նախագահ Սասուն Միքայելյանին հեռու պահել այդ որոշումից, հետևաբար, նաև՝ լուտանքներ ստանալուց։

Իսկ եթե Նիկոլ Փաշինյանն այս որոշման է եկել այլ զարգացումներից հետո՝ արդեն տալիս է լուրջ մտահոգվելու առիթ։

Շատերին է հայտնի Սասուն Միքայելյանի և Նիկոլ Փաշինյանի ոչ լավ հարաբերությունները, որոնցից ամենավերջինին հասարակությունն ականատես եղավ բոլորովին վերջերս, երբ Սասուն Միքայելյանն ու «Ծառուկյան» խմբակցության 9 պատգամավոր երաշխավորեցին քրեական հեղինակություն, «օրենքով գող» Ալիկ Բանդուրյանի՝ նորատուսցի Ալիկի համար, ով մեղադրվում է «Լիա» գեղեցկության սրահում երկու մարդու սպանության աղմկահարույց գործի շրջանակներում։

Միքայելյանի այս որոշումը խիստ քննադատվեց մամուլում, շատերը գրեցին, որ պատգամավորը «օրենքով գողին» ցանկանում է ազատության մեջ տեսնել, իսկ Նիկոլ Փաշինյանն էլ, ի պատասխան լրագրողների՝ իրեն ուղղված հարցերի՝ նշել էր, որ Սասուն Միքայելյանը երաշխավորությամբ է հանդես եկել առանց իր հետ համաձայնեցնելու։

«Դա ինձ հետ չի համաձայնեցվել։ Եվ ես շատ վատ եմ դրան վերաբերվում։ Ես այդ մասին ուղիղ և անկեղծ ասել եմ իմ ընկեր Սասուն Միքայելյանին»,–ասել էր վարչապետը։

Այդ չհամաձայնեցվելը կարող է բերել, փաստորեն, նաև ՔՊ-ի կազմալուծման, քանի որ Փաշինյանն արդեն իսկ ապացուցել է, որ իր հետ չհամաձայնողները հայտնվում են լուսանցքից դուրս վիճակում, որտեղ են այժմ Արտակ Զեյնալյանը, Էդմոն Մարուքյանն ու Արամ Սարգսյանը։

NEWSPRESS.am