Չստացված փոխվարչապետի «խոստովանությունը»

Բախտի բերմամբ Առաջին փոխվարչապետ դարձած Արարատ Միրզոյանը չի հասկանում, թե արտահերթ խորհրդարանական ընտրություններին արագացված կարգով ինչու պետք է չգնալ՝ առանց երկար-բարակ մտածելու, որ, օրինակ, դրա համար սահմանադրական փոփոխություններ են անհրաժեշտ, ինչը ժամանակատար աշխատանք է։

Այս մասին ասել է Միրզոյանը՝ «Ազատության» հետ զրույցում։ Ասելուց բացի, նաև ինքնավստահ հայտարարել է, որ ՀՀԿ-ն ընդամենը ժամանակ է ձգում և ստեղծում է բանակցությունների իմիտացիա՝ շեշտելով, որ ՀՀԿ-ի այս փորձերը չեն հաջողելու։ 

Միրզոյանը նաև հեգնել է և ընդգծել, որ եթե ՀՀԿ-ն ուզում էր փողոց դուրս գալ, ինչո՞ւ դուրս չեկավ։

«Ոնց ուզում ենք, էդպես էլ կանենք»,-ասել է Արարատ Միրզոյանը՝ ընդգծելով, որ այդպես կվարվեն, եթե ՀՀԿ-ն զիջման չգնա, և ասածն անխոս ուղղված էր առաջին հերթին ԱԺ փոխնախագահ Էդուարդ Շարմազանովին։

Խնդիրն այստեղ այն չէ, որ Արարատ Միրզոյանը մատ է թափ տվել ՀՀԿ-ականների վրա, այլ այն, որ դեռևս չաճած, քաղաքական գործչի չվերածված Արարատ Միրզոյանը կրկնել է այն, ինչի համար այդքան քննադատվեց իր թիմը։

Արարատ Միրզոյանի՝ «ոնց ուզենք՝ կանենքը» գալիս է լրացնելու «ինքան ուզենք՝ կխփենք»-ին, ինչը փաստում է, որ իշխող ուժը ժողովրդի անվան ու թիկունքի հետևում թաքնվելով՝ արդեն իսկ կորցրել է իրականության զգացումը։ 

Փոքր-ինչ ադեկվատ իշխանություն լինելու դեպքում, խորհրդարանում անգամ 50+1 տոկոս ունենալու պարագայում իրեն ժողովրդավար ուժ երևակայող թիմը չէր հանդգնի նման «պլինտուսից ցածր» մակարդակի զրույց ծավալել և գերմարդկային մտքեր հնչեցնել, բայց արի ու տես, որ Ազգային ժողովում մի բուռ էլ չկազմող խմբակցության ներկայացուցիչն իրեն նման պահվածք է թույլ տալիս, չգիտակցելով, որ հիասթափեցրել և հիասթափեցնում է իրենց շատ սիրելի ժողովրդին. իսկ եթե ժողովուրդը ձեռքը հետ քաշեց, Արարա՛տ Միրզոյան, ո՞վ ես լինելու այդ դեպքում:

Իսկ հրապարակը պահած ժովովուրդն արդեն հիասթափության շատ պատճառներ ունի՝ սկսած ներկուսակցական գզվռտոցից, նախկին թիմակիցներին ընդդիմություն դարձնելուց՝ մինչ 0 տոկոս տնտեսական աճ: Այնպես որ, «նախքան առուն թռչելը հո՛փ ասել պետք չէ», հատկապես, որ վայէջքը կարող է անկանխատեսելի լինել:

NEWSPRESS.am