Մալիում գրավված հյուրանոցից 80 պատանդ է ազատ արձակվել

Մալիի մայրաքաղաք Բամակոյում անհայտ անձինք կրակ են բացել Radisson Blu հյուրանոցում, հայտնում է Reuters գործակալությունը։ «Կրակահերթը սկսվել է վաղ առավոտյան։ Հավանաբար` դա պատանդներ վերցնելու փորձ է եղել։ Այժմ դեպքի վայրը շրջափակված է, ժամանել է ոստիկանությունը»,- ասվում է հաղորդագրության մեջ։

Հյուրանոցը գրավել են մարդիկ, որոնք բղավել են «Ալլահ Աքբար»։

Նրանք պատանդներից պահանջել են կարդալ Ղուրանն ու ազատ են արձակել նրանց, որոնք կարողացել են կրկնել կարդացածը։

Հյուրանոցում եղել է մոտ 170 պատանդ, այդ թվում՝ Ֆրանսիայի և Թուրքիայի քաղաքացիներ:

Մալիի բանակի հրամանատարի խոսքով՝ իսլամիստներն ազատ են արձակել 20 մարդու:
Ֆրանսիան Մալիի իշխանություններին աջակցություն է ցույց տալիս գրավված Radisson Blu հյուրանոցից պատանդներին ազատ արձակելու հարցում, հայտնում է Sky News Arabia-ն:

Ինչպես հայտնում են ֆրանսիական իշխանությունները, նրանք աջակցում են հիմնականում լոգիստիկ ու հետախուզական հարցերում։

Ֆրանսիայի արտգործնախարար Լորան Ֆաբիուսի խոսքով՝ իշխանությունները պատրաստ են ցանկացած միջոցառում ձեռնարկել՝ պատանդներին ազատ արձակելու համար։

Turkish Airlines ավիաընկերությունից հաղորդել են, որ ընկերության 3 աշխատակիցների հաջողվել է փախչել հյուրանոցից:

«Ընդհանուր առմամբ, պատանդ է վերցվել ընկերության 7 աշխատակից: Նրանցից 3-ն ազատ են արձակվել»,-հայտնել են Թուրքիայի ԱԳՆ-ից:

Reuters-ը հաղորդում է, որ դեռ հստակ տեղեկություն չկա՝ արդյո՞ք նրանք ազատ են արձակվել հատուկ գործողությունների արդյունքում, թե՞ հաջողվել է փախչել հյուրանոցից: