Ահա թե ինչու քայլեց Սասուն Միքայելյանը

«Քաղաքացիական պայմանագիր» կուսակցության վարչության նախագահ, ԱԺ պատգամավոր Սասուն Միքայելյանի որդին՝ Սևակ Միքայելյանը, ինքնառաջադրվել է հոկտեմբերի 21-ին Հրազդանի քաղաքապետի արտահերթ ընտրություններում:

Սասուն Միքայելյանի որդին, վստահաբար, քաղաքապետի պաշտոնում ինքնառաջադրվելու համարձակություն ունեցել է ոչ թե ունեցած կառավարման փորձի կամ ստացած գիտելիքների հարուստ պաշարի հաշվին, այլ՝ հոր քայլելու։

Այո՛, Սասուն Միքայելյանը հենց այնպես գաղափարի համար քայլողը չէր, և Նիկոլ Փաշինյանի հետ նա քայլեց, քանի որ իրեն տրվել էր խոստում։ Սակայն պարզվում է, որ Փաշինյանն իր հետ քայլողներին խոստացել է ոչ միայն վերջիններիս ապահովել պաշտոնով, այլ նաև նրանց մտերիմ բարեկամներին և հարազատներին՝ ազգուտակով, թոռով-ծոռով։

Ասվածն, իսկապես, Սասուն Միքայելյանի համար է, ով թավշյա հեղափոխությունից հետո շտապեց Հրազդանում սուրն աջ ու ձախ ճոճել՝ հրազդանյան դպրոցների երկարամյա ուսուցիչներին փոխարինելով իր հարազատներով ու ծանոթներով՝ և դարձյալ կարևոր չէր՝ ծանոթն ուսուցի՞չ է մասնագիտությամբ, թե՝ ոչ, կարո՞ղ է աշխատել, թե՝ ոչ: Չի կարող՝ կկարողնա՝ պետությունը դարձնելով իր համար փորձաքար։

Իսկ աշխատանքի արդյունավետության և պրոֆեսիոնալիզմի մասին Սասուն Միքայելյանի պարագայում անհույս է խոսելը։

Գրեթե չեք գտնի մեկին, ով կարող են Միքայելյանին ներկայացնել որպես ակտիվ պատգամավոր։ Գրեթե չեք գտնի մեկին, ով ցույց կտա, որ Միքայելյանն Ազգային ժողով է ներկայացրել օրենսդրական հանճարեղ նախագծեր, կամ հանդես եկել այս կամ հարցի վերաբերյալ սուր և իմաստուն դիտարկումներով։

Որևէ մեկը չի կասկածում, որ քաղաքապետ դառնալուց հետո նույն ջանասիրությամբ էլ աշխատելու է Սասուն Միքայելյանի որդին՝ Հրազդան քաղաքը դարձնելով փորձաքար սեփական կայացման և ամբիցիաների համար։

Ցավալին այստեղ այն չէ, որ երկիրը դարձրել են «պարապ վախտի խաղալիք», ցավալին այն է, որ թավշյա հեղափոխության օրերին իսկապես լավ երկիր ունենալու համար քայլած հազարավոր ՀՀ արժանապատիվ քաղաքացիներ մերժեցին Սերժին՝ հանուն արդարության, հանուն գիտելիքի, հանուն ազնվության՝ վերջ տալով «խծբ-ների» արատավոր ինստիտուտին, որի կնքահայրը ՀՀԿ-ն էր։ 

Եվ հիմա պարզվում է` Փաշինյանը շարունակում է նույն ՀՀԿ-ի գործը՝ առանց վերափոխելու և իմաստավորելու, իսկ սա հաստատ այդ արդարությանն և ազնվությանը սպասող հազարավոր քաղաքացիների համար դառնալու է հիասթափության պատճառ։
Երկիրը ՔՊ-ականացնելով՝ իրականում Նիկոլ Փաշինյանը որևէ հարց չի կարողանալու լուծել, քանի որ իր ստեղծած ՔՊ-ում են հանգրվանել անփորձ, անկարող և պրոֆեսիոնալիզմից հեռու պարապներ։ Իսկ երկիրը պարապների տեղը չէ՝ հաստատ։
ՀՀԿ-ի փոխարեն ՔՊ․ ահա թե ինչու քայլեց Սասուն Միքայելյանը

NEWSPRESS.am