««Ֆասի» ժամանակ խաժամուժը հարձակվում է Ֆեյսբուքով»․ Ալիկ Սարգսյանը՝ ֆեյքերի ու զոմբիների մասին

ՀՀԿ խմբակցության պատգամավոր, ՀՀ նախկին ոստիկանապետ Ալիկ Սարգսյանը չգիտի, թե ում կողմից են գործում ֆեյքերը, բայց վստահ է, որ մարդկանց վիրավորելու համար նրանք վարձատրվում են։

«Էսքան զոմբի մեր երկրում չի կարող լինել, սրանք պատվիրակված մարդիկ են, որոնք վարձատրվում են ինչ-որ մարդկանց, կառույցների կողմից և Ֆեյսբուքում վիրավորում են մարդկանց»,- լրագրողների հետ զրույցում խնդրին անդրադարձավ Ալիկ Սարգսյանը։

Թե ում կողմից են նրանք պատվիրված, նախկին ոստիկանապետը ենթադրությունները թողնում է ընթերցողներին՝ նկատելով, որ բավական է մի տեսակետ, երբ միանգամից 120 հոգով հարձակման անցեն, քանի որ նրանց հրահանգում են։

«Զոմբիները դիվանների վրա նստած, իրենց կեղտոտ սպարտիվկեքով, որ ո՛չ աշխատում են, ո՛չ ուղեղ ունեն, ո՛չ մի բանով զբաղվում են, էն ժամանակ էլ չեն աշխատել, հիմա էլ չեն աշխատում... Իհարկե, կազմակերպված է, էսքան խաժամուժ մեր երկրում չի կարող լինել: Մի բառ են լսում՝ ՀՀԿ, ու միանգամից հարձակվում են, կապ չունի այդ մարդը ով է, ոնց է ապրել: Արդյոք այդ ցուցակի մեջ եղել է, թե ոչ, արդյոք արժանի է այդ խոսքերին: Դա կապ չունի, տրվում է հարձակման հրաման՝ ֆաս, ու ֆասի ժամանակ խաժամուժը հարձակվում է Ֆեյսբուքով»,- ասաց պատգամավորը:

Նրա որակմամբ՝ ոչ մի դատողություն, ինչպիսին էլ որ այն լինի, չի կարող նորմալ արձագանք ստանալ այդ մարդկանց կողմից. «Ինչքան ուզում ես նորմալ բան ասա, որ օգուտ կլինի բոլորին, հասարակությանը, իշխանություններին, երկրի զարգացմանը, ինչ ուզում ես ասա, ուզում ես՝ հասարակ բարև տուր, այդ բարևի տակ իրենք ունեն համապատասխան մեկնաբանություններ»,- հայտարարեց Ալիկ Սարգսյանը:

Նախկին ոստիկանապետը նկատում է, որ դեմ չէր լինի պատժել բոլոր նրանց, ովքեր, իր խոսքով, հանիրավի ուղղակի վայրահաչում են: Ալիկ Սարգսյանն իրավիճակը բացասական է գնահատում՝ նշելով, որ իր փոքրիկ մեկնաբանության ներքո ինչ ասես՝ չեն գրել։

«Միգուցե շատերն ուրախանում են, թե՝ տեսաք, ինչ են գրել: Բայց թող իմանան, որ սրանք պատվերով գրող մարդիկ են, որ առաջին հրամանի դեպքում անունը կարդալուց հարձակվում են: Ամբողջ հասարակությունը դա կարդում է, այդ թվում՝ իմ հարազատները: Չեմ ուզում նրանց մասին ավելի վիրավորական բառեր ասել, պլինտուսից ցածր այդ տեսակները տառականների, այդ խաժամուժը, որ իրեն այդքան լկտի է պահում Ֆեյսբուքում, արդյո՞ք սա ժողովուրդն է, սա ժողովուրդ չի: Ժողովրդի մեջ ուղեղ ունեցող շատ մարդիկ կան, ոնց կարող է մարդը տունը նստած առավոտից երեկո վիրավորել մարդկանց»,- ընդգծեց Ալիկ Սարգսյանը:

Դիտարկմանը, թե ՀՀԿ-ն էլ ունի ֆեյքեր, որոնք նման բաներ են գրում, Ալիկ Սարգսյանն արձագանքեց. «Ես թքել եմ այն ֆեյքերի վրա, որոնք ՀՀԿ-ի անունից քննադատում են ինչ-որ մեկին: Ինձ մի խառնեք այդ ցուցակին, ես դուրս եմ այդ ամեն ինչից, մի քիչ էլ վեր եմ կանգնած այդ ամենից»: