«Դու ինձ վրա բոչկա ես գլորել, թռել ես իմ գլխի վրայով». հերթական ապտակը՝ Փաշինյանին

Մինչ վարչապետ Նիկոլ Փաշինյանը ՄԱԿ-ի միջանցքներում հանդիպումներ է ունենում այս կամ այն պաշտոնյայի հետ՝ այդպես էլ կարոտ մնալով Դոնալդ Թրամփի հետ թեկուզ միջանցքային հանդիպման, ուշագրավ զարգացումներ են տեղի ունենում հայաստանյան կառավարությունում:

Պարզվում է՝ վարչապետի աշխատակազմի գործերի կառավարիչ Վահան Պապիկյանն աշխատանքից ազատվելու դիմում է պարտադրել գրել աշխատակիցներից մեկին այն պատճառով, որ վերջինս հրաժարվել է երեկոյան արտաժամյա աշխատանք կատարել և այդ մասին տեղյակ է պահել աշխատակազմի ղեկավար Էդուարդ Աղաջանյանին:
«Դու ինձ վրա բոչկա ես գլորել, թռել ես իմ գլխի վրայով»,–աշխատակցին ասել է Վահան Պապիկյանն ու ազատել աշխատանքից՝ իմանալով, որ կինը միայնակ մայր է և եկամուտի ուրիշ ոչ մի աղբյուր չունի:

«Սիրելի բարեկամներ:

Ես կոռուպցիոներ չեմ և ոչ էլ հանցագործ: Ես ընդամենը փոքրիկ աշխատավարձով յոլա գնացող պետական աշխատող էի և ոչ մեկի վրա «բոչկա գլորելու» նպատակ չունեի:

Գործերի կառավարչությունում ցինիկ և արհամարհական վերաբերմունքի են արժանանում ԲՈԼՈՐ աշխատողները, սակայն լռում են: ՎԱԽԻՑ: Իսկ ես և էլի մի հոգի, որ չվախեցանք, ենթարկվեցինք բարոյահոգեբանական ճնշումների. արդյունքում գործազուրկ դարձանք:

Նիկոլ Փաշինյանի իշխանության համար պայքարել են իմ քույրերը, մորաքույրը, հորաքույրը և հարյուր հազարավոր քաղաքացիներ: ՄՈԼՈՐՎԱԾ քաղաքացիներ: Իրականում ոչ Հայաստանի Հանրապետության հպարտ քաղաքացի գոյություն ունի, ոչ արդարություն, ոչ մարդասիրություն:

Ես հիմա Նիկոլի համար դոշ տված իմ հայրենակիցներին ասում եմ՝ եկեք, պահեք իմ յոթամյա անհայր երեխային, ով կոմունալ վճարումներ և օրվա հաց գնելու հնարավորություն այլևս չունի»,- իր ֆեյսբուքյան էջում գրել է կառավարության՝ արդեն նախկին աշխատակիցը:

Ցավալի, բայց ակնհայտ փաստ է՝ ՔՊ-ականները գնալով անկառավարելի են դառնում, և վարչապետի վերահսկոությունից այս անկառավարելիությունը դուրս է գալիս:
Մի կողմից Նիկոլ Փաշինյանն ունի գրագետ և կիրթ թիմակիցների խիստ պակաս, և ասվածի ապացույցն օրերս Արմավիրի ծույլիկ մարզպետն է, մյուս կողմից՝ ՔՊ-ականները տեղ են բացում իրենց մյուս անփորձ թերուսների համար, որովհետև միակ բանը, որի համար այս մարդիկ քայլել են, պետական կառավարման ապարատ մտնելն ու այս կամ այն պաշտոնը թռցնելն է:

Կադրային ջարդ չանելու խոստում տված, բայց կադրային ջարդ արած վարչապետին, փաստորեն, սկսել են չզիջել նաև իր՝ ոտքերն ամպոտ թիմակիցները՝ առանց գեթ մեկ վայրկյան մտածելու, թե այդ կարճատեսությունն ինչ կարժենա հեղափոխություն արած ՀՀ քաղաքացիների վրա:

Իսկ առաջին ծիծեռնակն արդեն իսկ կա՝ 800 հազարից ավելի ընտրելու իրավունք ունեցող քաղաքացուց շուրջ 300 հազարն է գնացել ընտրության:

Զոմբիացման փուլն այլևս ավարտված է, և քաղաքացիները վերադառնում են իրականություն, իսկ թե ինչ իրականություն կվերդառնա վարչապետի աշխատակազմի գործերի կառավարիչ Վահան Պապիկյանը՝ ականատես կլինենք շուտով:

NEWSPRESS.am