Ընտրությունները մրցակցային չէին, իսկ ցածր մասնակցությունը «հաղթողի նզովքն» էր․ քաղաքագետ

Քաղաքագետ, Կովկաս ինստիտուտի տնօրեն Ալեքսանդր Իսկանդարյանը «Բարգավաճ Հայաստան» կուսակցությունից ավելի շատ ձայներ էր սպասում, սակայն այլ արդյունքներ եղան։

Ըստ քաղաքագետի՝ «Բարգավաճ Հայաստանի» ավանդական ընտրազանգվածը, որպես կանոն, Երևանում չի գտնվում, այլ գյուղական բնակավայրերում, ինչը և դարձավ գործարար Գագիկ Ծառուկյանի կուսակցության անհաջողության պատճառը:

Նա լրագրողների հետ զրույցում նկատեց, որ, ընդհանուր առմամբ, այլ արդյունքներ չէր սպասում։

«Ես «Իմ քայլը» դաշինքի հնարավորությունները գնահատել էի 75-80 տոկոսի միջև: Այսինքն՝ ոչ այդքան բարձր: Սա կարող է այն բանի արդյունքը լինել, ինչը տեղի ունեցավ վերջին օրերին: Նկատի ունեմ «Բարգավաճ Հայաստանում» խուզարկությունները և այդ խուզարկությունների հետ կապված հայտարարությունները»,- ասաց Իսկանդարյանը:

Նրա գնահատմամբ` սա ոչ թե քաղաքապետի ընտրություն էր, այլ վստահության քվե։

«Երևանցիներն այս ընտրություններում նվազագույնը հաստատեցին գործադիր իշխանության չափազանց բարձր վարկանիշը»,- նշեց քաղաքագետը:

Ինչ վերաբերում է ընտրողների պասիվ մասնակցությանը, ապա Իսկանդարյանը հիշեցրեց, որ նախորդ տարի այն դրանից էլ ցածր էր:

«Ցածր մասնակցությունը շատ հեշտ է բացատրել, քանի որ դա, այսպես ասած, «հաղթողի նզովքն» է: Այսինքն՝ այս ընտրությունները պարզապես մրցակցային չէին»,- պարզաբանեց քաղաքագետը՝ ընտրությունները որակելով քաղաքական ընտրություններ։