«Գոնե էս քյորփին թողեք Փաշինյանի հետ նկարվի». թիկնազորի ամուր օղակը պայթեցրեց փուչիկը. Փաշինյանն անհասանելի է

Անկախության տոնին նվիրված միջոցառման ժամանակ վարչապետ Նիկոլ Փաշինյանն իր ընտանիքով անցավ հրապարակով՝ կառավարության շենքից գնաց մինչև Ամիրյան փողոցում գտնվող սրճարան:

Թեև այդ ժամը համընկավ սելֆիի համար նախատեսված ժամին, սակայն քաղաքացիներից և ոչ մեկին այդպես էլ չհաջողվեց  վարչապետի, կամ նրա ընտանիքի անդամներից որևէ մեկի հետ լուսանկարվել:

Ակնհայտ էր՝ վարչապետն այլևս այն Նիկոլը չէր, որի անունը վանկարկելով՝ ժողովուրդը տարավ ու նստեցրեց աթոռին: Նրա թիկնապահները 1-2 մետր, տեղ-տեղ ավելի շատ հեռավարության վրա պաշտպանում էին վարչապետին՝ իրեն ընտրած ու շարժման ժամանակ նրա հետ ուս-ուսի տված քաղաքացիներից:

Զուր էր քաղաքացիներից մեկը գոռում. «Ես եմ ընտրել նրան, թողեք նկարվեն գոնե»: Նրան լսող չկար: Փաշինյանն էլ արդարանում էր, թե հո չի՞ կարող բոլորի հետ նկարվել:

Անկեղծ ասած՝ մի երկուսը հասցրեցին արագ մոտենալ ու նկարվել, բայց թիկնազորի պետն անմիջապես հրահանգեց՝ «կարիդորը մաքրել», և մարդիկ, թիկնապահների «ջանքով», անմիջապես հեռացվեցին Փաշինյանից. «կարիդորը մաքվեց»...

Տեսարանը տգեղ էր, բայց ավելի տհաճ էր ու վիրավորական այն, որ քաղաքացիներից մեկը, իր փոքրիկ երեխայի հետ հազիվ մոտենալով դոշով ու ամբողջ մարնով Փաշինյանի կողմից հատվող տարածքը պահպանող թիկնապահին, ձայն տվեց.

«Գոնե էս քյորփին թողեք Փաշինյանի հետ նկարվի: Պարո՛ն Փաշինյան, քյորփիս հետ նկարվեք, էլի»,-երեխային բարձրացնելով և նրան դեպի Փաշինյանը մեկնելով՝ ասաց տղամարդը:

Փաշինյանն թեկնապահների հետևից արձագանքեց. «էնա ըտեղից նկարի էլի», ու անցավ անտարբեր՝ անգամ նկարվելու համար այդ կողմ չշրջվելով:

Հասնելով սրճարանին, Փաշինյանը հավաքվածներից «ընդմիջում խնդրեց» և իր աղջիկների հետ մտավ սրճարան:

Իսկ երբ «ընդմիջումն» ավարտվեց, նա դարձյալ ձեռքձեռքի տված թիկնապահների «պատի» օգնությամբ, հետ գնաց կառավարության շենք. դարձյալ առանց շփվելու և առավելևս նկարավելու իր ժողովրդի հետ:

Նիկոլ Փաշինյանը փաստորեն այդ կերպ փուչիկ դարձրեց իր իսկ կառավարության կողմից ձևավորած այն տեսակետը, թե «նոր Հայաստանում, նոր իրավիճակում խնդիրը դրված է ցույց տալը, որ հասարակական, հանրային, քաղաքական, գործիչների և քաղաքացիների միջև չկա որևէ դիստանցիա, բարիեր, չկա անհասանելիության սկզբունքը...»։

Այս կերպ փուչիկի նման պայթեցին նաև Փաշինյանի խոսքերը, թե եկիրը ժողովրդինն է, ու ժողովուրդը պահանջատեր է:

Ցավով սակայն պետք է նշենք, որ քչերն են գիտակցում այն, որ օրեցօր ավելացող այս երևույթներն ու վարչապետի նման  վերաբերմունքը ցույց է տալիս, որ ժողովուրդը ո՛չ թե պահանջատեր է, այլ հպատակ, և որ իրենց նոր Հայաստանի ղեկավարներ հռչակած իշխանությունը կամա թե ակամա, աստիճանաբար նմանվում է նախորդներին՝ «դիստտանցիա» պահելով իր ու ժողովրդի միջև և չնակտելով նրան: Մինչդեռ հեղափոխական շարժման նպատակը ամենևին սա չէր, ու մարդիկ փողոց դուրս չեկան՝ իշխանությունից նորից արհամարվելու և նրանից հեռանալու համար. Փաշինյանն այլևս անհասանելի է...

Արմինե Մկրտումյան