Տիգրան Համասյանի համերգից ստացված հասույթը մասամբ տրամադրվելու է Հայաստանի մանուկներ հիմնադրամին

Հռչակավոր դաշնակահար և երգահան Տիգրան Համասյանը հոկտեմբերի 14-ին ելույթ է ունենալու Լոս Անջելեսի Կալիֆոռնիայի համալսարանում (UCLA)։

Կատարողական արվեստի կենտրոնում (CAP) կայանալիք համերգի խորագիրն է «Ձոն Գյումրուն»։ Սա երաժշտական իմպրովիզացիայի վարպետի վերջին ալբոմի վերնագիրն է, ու հենց այս հավաքածուի գործերն են հնչելու սրահում։

Համալսարանական սոլո համերգի հասույթի 10 տոկոսն ուղղվելու է Հայաստանի մանուկներ հիմնադրամին (ՔՈԱՖ)։ ՔՈԱՖ-ի տնօրենների խորհուրդը հոգում է Հիմնադրամի բոլոր վարչական ծախսերը, իսկ բարերարների նվիրատվությունը 100 տոկոսով ուղղվում ու ծառայում է հենց ծրագրերի իրագործմանը։

«Հայաստանի մանուկներ հիմնադրամի առաջատար դերը գյուղական համայնքների զարգացման գործում հատկապես ամրապնդվեց Լոռու մարզում տեխնոլոգիապես նորարար ՔՈԱՖ ՍՄԱՐԹ կենտրոնի բացմամբ,- ասաց ՔՈԱՖ-ի հիմնադիր և գործադիր տնօրեն, դոկտոր Գարո Արմենը։- Մենք բարձր ենք գնահատում CAP UCLA հետ գործընկերային համաբերությունները՝ հիմնված նույն արժեքների ու առաքելության վրա։ Շնորհակալ ենք, որ համերգի հասույթից ՔՈԱՖ-ին նվիրատվություն են անում։ Եվ հատկապես շնորհակալ ենք Տիգրան Համասյանին՝ հայրենիքում երեխաների կյանքի որակը բարձրացնելու ուղղությամբ ներդրվող ջանքերի համար»։

Դաշնակահար Տիգրան Համասյանը մշտապես փորձել է Հայաստանում դրական փոփոխություններ բերել իր նվիրումով և միացել է Հայաստանի մանուկներ հիմնադրամին՝ երիտասարդներին քաջալերելու գործում։

Երաժիշտ, կոմպոզիտոր, ծնունդով գյումրեցի Տիգրան Համասյանը հռչակվել է իր սերնդի ամենանշանակալի ու յուրօրինակ ջազա-ռոքային դաշնակահարներից մեկը։ Նա աննկարագրելի վարպետությամբ է մերում ջազային իմպրովիզացիան ու ժողովրդական երաժշտությունը։

Բրիտանական «The Guardian» թերթը հիացմունք է հայտնել. «Նա ջազի ամենաթեժ դաշնակահարներից է, սիրում է տարբեր բաներ խառնել միմյանց՝ բիբոփ, թրեշ-մետալ կամ դաբսթեփ։ Բայց իր սիրտը ժողովրդական մեղեդիների մեջ է՝ հայրենի Հայաստանում»։

Լուսանկարը՝ Ելենա Համասյանի