Երկու օր ժամանակ ունեք՝ տնտեսագետներով, հոգեբաններով, ռեպետիտորներով պատրաստվելու բանավեճին. Նաիրա Զոհրաբյանը՝ Հայկ Մարությանին

Ի տարբերություն մնացած քաղաքական ուժերի՝ անխտիր, ԲՀԿ-ն միակ քաղաքական ուժն է, որ լուծումներին զուգահեռ՝ առաջարկել է նաև կոնկրետ ներդրումային փաթեթներ, որոնցից յուրաքանչյուրի տակ դրված են 100 միլիոնավոր դոլարներ:

Այդ մասին այսօր լրագրողների հետ զրույցում ասաց ԲՀԿ քաղաքապետի թեկնածու Նաիրա Զոհրաբյանը: 

«Հիշում եք, որ Մալաթիա-Սեբաստիա համայնքում ես բանավեճի հրավիրեցի «Իմ քայլը» դաշինքի թեկնածու Հայկ Մարությանին: Ինչո՞ւ ես առանձնացրեցի հատկապես պարոն Մարությանին՝ մեծագույն հարգանք ունենալով Երևանի ավագանու բոլոր թեկնածուների հանդեպ: Որովհետև Հայկ Մարությանը միակ թեկնածուն  էր, որ ասաց՝ մեր դեմ խաղ չկա: Հայկ Մարությանը միակն էր, որ ասաց՝ մենք սպիտակ ենք, դուք սև եք: Իր քաղաքական թիմը միակն է, որ ասում է՝ գալու ենք, ջախջախելու ենք, հաղթելու ենք»,- ասաց Զոհրաբյանն ու հավելեց, որ ինքը բանավիճելու օրակարգ ունի միայն «Իմ քայլը» դաշինքի քաղաքապետի թեկնածուի հետ:

Քաղաքապետի թեկնածուն դիմելով լրագրողներին՝ ասաց, որ սա աբսուրդ է. «Դուք տեսե՞լ եք երբևէ, հարգելի լրագրողներ, բանավեճ՝ նախնական տեսաձայնագրմամբ: Բանավեճ՝ ես հասկանում եմ ուղիղ եթերով: Տեսաձայնագրմամբ բանավեճը ես համարում եմ վիրավորանք՝ յուրաքանչյուրիս հասցեին»:

Նաիրա Զոհրաբյանի խոսքով՝ տեսաձայնագրմամբ բանավեճ ասելով ինքը հասկանում է, որ Հանրային հեռուստաընկերությունը սպասարկում է թեկնածուներից մեկի շահը, օրակարգը և ձևաչափը: 

«Քանի որ ես երբևէ որևէ բանավեճից չեմ խուսափել, ձեր միջոցով նորից դիմում եմ «Իմ քայլը» դաշինքի քաղաքապետի թեկնածուին, հեշտացնում եմ խնդիրը իր համար: Պատրաստ եմ ընդունել բանավեճի Ձեր օրակարգը: Օրակարգը ընտրում եք դուք․ կուզեք՝ քաղաքական, կուզեք՝  արտաքին քաղաքական, կուզեք՝ տնտեսական, կուզեք՝ բացառապես երևանյան հիմնախնդիրների վերաբերյալ, ավելի եմ հեշտացնում խնդիրը: Կուզե՞ք՝ այն խնդիրների վերաբերյալ, որոնք Դուք Ձեզ համար համարում եք կոմֆորտ՝ մշակույթ: Եթե Դուք գտնում եք, որ այն, ինչ Դուք ներկայացնում եք հանրությանը՝ «Ազիզյանններ», «Սուպեր մամա»-ներ, դա արվեստ և մշակույթ է, ես՝ արդեն որպես մասնագիտությամբ կինոգետ, պատրաստ եմ այդ հարթակում բանավիճել ձեզ հետ, բայց միայն և բացառապես Ձեզ հետ, միայն և բացառապես ուղիղ եթերում, որ հեռուստաընկերությամբ կուզեք. ընտրում եք Դուք»,- առաջարկով հանդես եկավ քաղաքապետի թեկնածուն:

Ֆեյսբուքյան էջերով իր դեմ հրապարակումներ անողներին որակելով «ֆեյսբուքյան հրոսակներ»՝ Զոհրաբյանն ասաց, որ որևէ բանավեճից չի հրաժարվում. «Նաիրա Զոհրաբյանն ունի արժանապատվություն տեսաձայնագրվող բանավեճերի չմասնակցելու և ասում եմ՝ հարգում եմ բոլոր թեկնածուներին, բայց նորից եմ ասում, հարգելի՛ լրագրողներ, ինչպե՞ս եք պատկերացնում բանավեճ՝ 12 հոգով: Բանավիճում եմ ես բացառապես իր հետ, սա է իմ օրակարգը, սա է իմ ձևաչափը սա է: Երկու օր ժամանակ ունեք՝ տնտեսագետներով, քաղաքագետներով, հոգեբաններով, ռեպետիտորներով պատրաստվելու բանավեճին»,- եզրափակեց Զոհրաբյանը: