Քոչարյան, Սարգսյան, հերթը Փաշինյանինն է. նվիրվում է, օգտագործվում, դավաճանում...

«Օրինաց երկիր» կուսակցության նախագահ Արթուր Բաղդասարյանը հերթական անգամ առիթը բաց չի թողել Նիկոլ Փաշինյանի կամ որ նույնն է ժողովրդի մեծամասնության սիրտը շահելու: Նա հայտարարությամբ է հանդես եկել ու հայտնել, թե աջակցում է վարչապետին՝ արտահերթ խորհրդարանական ընտրություններ անցկացնելու գաղափարի շուրջ: Բնական է Բաղդասարյանի ռեակցիան. Ազգային ժողովից դուրս մնացած ուժը շանսեր է փնտրում ևս մեկ անգամ այնտեղ «խցկվելու»: 

Արթուր Բաղադսարյանը, հիշեցնենք, նաև Վանեցյանի ու Խաչատրյանի գաղտնալսման ձայնագրության հրապարակման օրն էլ մի փրփրալի լվացքաջրով փորձել էր լվանալ սեփական երեսը՝ զորակցություն հայտնելով ԱԱԾ տնօրենին ու ՀՔԾ պետին: Հարցնող լինի՝ սպասո՞ւմ էին վերջիններս այդ խղճուկ զորակցությանը: Իրենք կիմանան: 

Բաղդասարյանը, մասնավորապես, հայտարարել էր.

«Հաշվի առնելով ստեղծված իրավիճակը, բացառելով համագործակցությունը Ռոբերտ Քոչարյանի հետ՝ ես և իմ կողմից ղեկավարվող Օրինաց Երկիր կուսակցությունը մեր լիակատար աջակցությունն ենք հայտնում Ազգային անվտանգության ծառայության տնօրեն պարոն Արթուր Վանեցյանին և Հատուկ քնչական ծառայության պետ պարոն Սասուն Խաչատրյանին: Մարտի 1-ի լիարժեք բացահայտումը, կոռուպցիայի և թալանի դեմ պայքարը մեր երկրի առջև ծառացած այն կարևորագույն մարտահրավերներն են, որոնք պետք է հաղթահարվեն: Մաղթում եմ Ձեզ կամք, կորով և վճռականություն՝ սկսած գործը մինչև վերջ տանելու համար»: 

Հայտարարությունից պարզ է, չէ՞ դառնում, որ Բաղդասարյանն էժանագին դիվիդենտներ է հավաքում՝ շահարկելով Ռոբերտ Քոչարյան անուն ազգանունը: Բացի այդ էլ, օրինաց՝ օրենքի երկիր կառուցել պատրաստվող Բաղդասարյանը խրախուսում է բարձրաստիճան պաշտոնյաների անմիջական միջամտությունը դատարանների վրա:

Առնվազն տարօրինակ է: 

Սա իր հերթին: Այս ամենը, սակայն, գուցե հասկանալի լիներ ու տարօրինակ չթվար, եթե այս ճոռոմ հայտարարությունների հեղինակը չլիներ մեկը, ում կուսակցությունը քանիցս ճամբարափոխ է եղել: Նախ Քոչարյանի իշխանության ժամանակ եղել է ԱԺ նախագահ, ապա դարձել ընդդիմություն, ապա նույն Մարտի 1-ի իրադարձությունների ժամանակ, պարոնայք, նույն Մարտի 1-ի ժամանակ կիսատ թողել պայքարը, ժողովրդին ու գնացել Սերժ Սարգսյանի թևի տակ հովանի գտնելու: 2008 թվականի մայիսի 4-ին արդեն ՀՀ նախագահ Սերժ Սարգսյանի հրամանագրով՝ նշանակվել է Ազգային անվտանգության խորհրդի քարտուղար: Հետո ամբողջ 6 տարի, պարոնայք, սույն քաղաքական գործիչն աշխատել է այսօր այլևս մերժված Սերժ Սարգսյանի հետ: Հետագայում զգալով, որ իր երգն այլևս երգված է, նույնիսկ փորձել է վերափոխել կուսակցության անունը, բայց ապարդյուն: Այս անվանումով էլ նրան և նրա կուսակցությանը ժողովուրդը չհավատաց, և նա չհայտնվեց Ազգային ժողովում:

Ժողովրդի հիշողությունը երկար է այնքան, որ չմոռանա նաև Վանաձորի ավագանու ընտրությունները, երբ հրաշքով Մամիկոն Ասլանյանը դարձավ քաղաքապետ, ինչին հետևեց Ասլանյանի և Բիշարյանի պատմական համբույրը: 

Հիմա էլ Երևանի ավագանու ընտրությունները:

Թե այդքան մտահոգ է Արթուր Բաղդասարյանն ու յուր կուսակցությունը Երևանի ապագայով ու թե այդքան հավատում է Փաշինյանին ու իր թիմին, էլ ինչո՞ւ է քաղաքապետի սեփական թեկնածուին առաջադրել: Իհարկե, չենք զարմանա, եթե ավագանու կողմից քաղաքապետ ընտրելու ժամանակ ՕԵԿ-ականները, եթե իհարկե, նրանք կանցնեն քաղաքապետարան, ընտրեն արդեն Հայկոյին՝ ևս մեկ անգամ վերահաստատելով իրենց անդավաճան նվիրվածությունը վարչապետին: 

Բոլոր պարագաներում, ձեռագիրը, այնուամենայնիվ, չի փոխվում՝ անդավաճան նվիրվում են նոր իշխանությանը, օգտագործվում ու դավաճանում են: Նվիրվում, օգտագործվում, դավաճանում... 

Արիանա Հովսեփյան

NEWSPRESS.am-ի հիմնադիր-տնօրեն