Պինդ տղերքի տեռորը հասավ մեդիային․ հերթական խայտառակ տապալումը

ՀՀ ոստիկանության 6-րդ վարչության և Քննչական կոմիտեի աշխատակիցներն այսօր խուզարկություն են անցկացրել Yerevan.today կայքի խմբագրությունում:

Խուզարկությունը կատարվել է ՀՀ ազգային անվտանգության ծառայության տնօրեն Արթուր Վանեցյանի և ՀՀ հատուկ քննչական ծառայության պետ Սասուն Խաչատրյանի միջև տեղի ունեցած հեռախոսազրույցի գաղտնիությունը խախտելու՝ այն ձայնագրելու և տարածելու դեպքի առթիվ հարուցված քրեական գործի շրջանակում:

Սիրո և հանդուրժողականության ֆոնին իշխանության եկած ուժայինները հերթական խայտառակ վրիպումը թույլ տվեցին, և սա այն դեպքում, երբ հասարակությունը դեռ չի հասցրել մարսել նախորդը՝ սկանդալային գաղտնալսված ձայնագրությունը, որի հետքերով էլ գնացել էին Yerevan.today-ի խմբագրություն։

Հարց է առաջանում՝ իսկապե՞ս ՀՔԾ-ն և ԱԱԾ-ն այնքան միամիտ են, որ մտածում են, թե այդ ձայնագրության հետքերը կարող են հասնել խմբագրություն․ եթե այո, ապա կարող ենք ասել, որ մեր երկրի անվտանգությունը վստահված է պրոֆեսիոնալիզմից հազարավոր կիլոմետրեր հեռու գտնվող մարդկանց։

Հայաստանի քննչական մարմինները, փաստորեն, ի վիճակի չեն իրականացնել պատշաճ քննություն, և ստիպված են մամուլի հրապարակումների հետևից ընկած՝ հասնել կայքի խմբագրություն, մինչդեռ փորձագիտական հանրությունը խոսում էր գաղտնալսված ձայնագրության հետքերով դրսի ուժայիններին հասնելու անհրաժեշտության մասին, ինչը մերոնց պարագայում դժվար է պատկերացնել։

Նշենք, որ ուժային կառույցները խուզարկություն են իրականցարել նաև կայքի սեփականատիրջ տանը՝ փորձելով այնտեղ գտնել գաղտնալսման սարքավորումներ։

ԱԱԾ-ն և ՀՔԾ-ն նշել են, որ Yerevan.today-ի խմբագրության խուզարկությունը կապված է այն հանգամանքով, որ առաջինը այս կայքն է հրապարակել ձայնագրությունը։

Այստեղ տեղին է հիշեցնել, որ Մանվել Գրիգորյանի՝ ԱԱԾ մեկուսարանից հայտնված լուսակնարն առաջինը հրապարակեց Նիկոլ Փաշինյանի կայքը՝ «Հայկական ժամանակ»-ը, իսկ այն ժամանակ ԱԱԾ-ի դիմակավոր պնդոտ տղաները նրանց չայցելեցին՝ փորձելով պարզել նկարի ծագումնաբնությունը։

Սա ևս մեկ անգամ ապացուցում է՝ նոր ռեժիմը կրկնում է հնի մեթոդները, և շուտով հասարակությունն ականատես է լինելու «Նիկոլին դեմ ես՝ սիգնալ տուր» ակցիաների մեկնարկին։ 

Նշենք, որ խմբագրության խուզարկությունն արդեն իսկ արժանացել է անհանգստության պետակական համակարգում՝ այս մասին հայտարարություն է տարածել ՄԻՊ-ը և քրեական հետապնդման մարմնից պահանջել պարզաբանումներ:

NEWSPRESS.am