Հայկ Մարությանն այլևս «պոչ խաղացնելու» տեղ չունի․ դուխով բանավեճի սպասումով․․․

Երևանի ավագանու ընտրություններին մասնակցող քաղաքական կուսակցությունների և դաշինքների համար սահմանված քարոզարշավի ժամկետն այս ուրբաթ կավարտվի, սակայն առաջատար ուժերի քաղաքապետի թեկնածուների քաղաքական դեբատներին հասարակությունը դեռևս ականատես չի եղել։

«Իմ քայլը» դաշինքի քաղաքապետի թեկնածու Հայկ Մարությանը հիմնական «պոչ խաղացնողն» է, որը շարունակաբար կրկնում է, որ պատրաստ է գնալ բանավեճի, բայց միայն, ինչպես ինքն է ասում, իր 11 օպոնենտների հետ։

Հայկ Մարությանը շատ լավ գիտակցում է, որ 11 հոգով բանավիճելը շատ ավելի ձեռնտու տարբերակ է, քան, ասենք, երեք չորս թեկնածուի հետ բանավիճելը, ինչը շատ ավելի նախընտրելի է՝ հաշվի առնելով հեռուստաեթերի կանոնները։

Բնականաբար, 11 հոգով մարտի մտնելուց հետո, ամեն մեկին կարելի է հատկացնել 5 րոպե, իսկ մի քանի հոգով բանավեճի մեջ մտնելու համար աննախադեպ շատ է լինելու թեկնածուներին հատկացված խոսելաժամանակը, ուստի Հայկ Մարությանն այստեղ է, որ մտածելու բան ունի, հետևաբար՝ նման հայտարարություն անելով, ոչ թե փորձում է հանդես գալ հումանիզմի դիրքերից, այլ ընդամենը փորձում է սպրդել մի տեղից, որտեղ ինքն իրեն կզգա՝ ինչպես ձուկը ցամաքում։

Հայկ Մարությանին երեկ հրապարակավ բանավեճի ձեռնոց նետեց «Ծառուկյան դաշինք» խմբակցության քաղաքապետի թեկնածու Նաիրա Զոհրաբյանը։ Բանավեճը կազմակերպելու պատրաստակամություն արդեն հայտնել է «Երկիր մեդիա» հեռուստաընկերության մեկնաբաններից մեկը՝ խոստանալով բոլոր 11 թեկնածուներին հրավիրել բանավեճի։

Մեկնաբանի ֆեյսբուքյան գրառման տակ արդեն իսկ արձագանքել են մի շարք թեկնածուների ներկայացուցիչներ՝ շեշտելով, որ իրենց թեկնածուն պատրաստ է գալ և մասնակցել բանավեճին։

Հայկ Մարությանը կրիկին լռում է, դեռևս նրա կամ նրա թիմակիցների կողմից որևէ արձագանք չկա․ հավանաբար թեկնածուն իր որոշումը դեռևս պետք է համաձայնեցնի Նիկոլ Փաշինյանի հետ՝ վարչապետի մոտ անցնելով նաև համապատասխան դասընթաց։

Իսկ եթե Հայկ Մարությանն այս շանսն էլ տապալեց՝ փորձելով այս կամ այն պատճառաբանություններով հրաժարվել բանավեճից, կփաստի մեկ բան. դուխով բանավեճն իր խելքի բանը չէ։

NEWSPRESS.am