Հայկոյի հաղթանակի դեպքում՝ Սերժ Սարգսյանի փեսայի սանիկը Կենտրոնի թաղապետ կկարգվի

Տեղեկություններ կան, որ «Իմ Քայլը» դաշինքը համալրվել է մարդկանցով, ովքեր կասկածելի և անմիջական կապեր ունեն նախորդ իշխանության «դեմքերի» հետ։

Ըստ պաշտոնական լուրերի՝ Երևանի ավագանու ընտրություններին մասնակցող «Իմ Քայլը» դաշինքի կողմից քաղաքապետի թեկնածու առաջադրված Հայկ Մարությանի գլխավոր շտաբի պետը Սիփան Փաշինյանն է։ Սակայն, NEWSPRESS․am-ի աղբյուրների համաձայն, աշխատանքներն ամբողջությամբ համակարգում է Վիկտոր Մնացականյանը, ով զբաղեցնում է դաշինքի ցուցակի 42-րդ տեղը։

Մեր աղբյուրի համաձայն՝ Վիկտոր Մնացականյանը Միքայել Մինասյանի սանիկն է։ Այսինքն՝ ՀՀ երրորդ նախագահ Սերժ Սարգսյանի դստեր ամուսնու սանիկը։

Մեր աղբյուրը վստահեցնում է, որ Մինասյանի սանիկը ո՛չ միայն իր ձեռքն է վերցրել քարոզարշավի հետ կապված աշխատանքների համակարգումը, այլև մեծ ախորժակ ունի։ Աղբյուրը հայտնում է, որ դաշինքի հաղթանակի դեպքում Վիկտոր Մնացականյանին խոստացել են Կենտրոն վարչական շրջանի ղեկավարի պաշտոնը։

Թե ինչ ճանապարհով և ինչու է հանկարծ Սերժ Սարգսյանի փեսայի սանիկը հայտնվել «Իմ քայլը» դաշինքի ավագանու ցուցակում, չենք քննարկում՝ մեկնաբանությունները թողնելով ձեզ։

Պարզապես, մի փոքրիկ հիշեցում․ Միքայել Մինասյանի՝ Միշիկի և Հայկ Մարությանի գործընկերային հարաբերությունները նոր չեն ձևավորվում։ Նրանք վաղուց են աշխատում, շփվում ու հարաբերվում միմյանց հետ։

Այս պահին նշենք միայն փաստերից մեկը․ Մինասյանին պատկանող «Արմենիա» հեռուստաընկերության եթերը ո՛չ շարժման օրերին, ո՛չ էլ այսօր, չի դադարել սպասարկելուց Հայկ Մարությանին։ «Արմենիա»-ով այսօր ակտիվորեն հեռարձակվում են Հայկ Մարությանի ֆիլմերը։ Թեև այսօր խոսվում է այն մասին, թե Մինասյանը վաճառել է ընկերությունը, սակայն, մեզ հասած լուրերի համաձայն, նրա խոսքն, այնուամենայնիվ, վճռորոշ է այստեղ։ 

Կրկին առանց մեկնաբանության․․․

NEWSPRESS.am