Ո՞ւմ է Կարգին Հայկոն «գիժ» անվանում, ո՞վ է ավելի «գիժ» և ի՞նչ կանեիր դու, եթե...

Երևանի ավագանու արտահերթ ընտրություններում «Իմ քայլը» դաշինքի քաղաքապետի թեկնածու Հայկ Մարությանի խոսակցական արտահայտչամիջոցների հերթական «գլուխգործոցը» դրսևորվել է Նուբարաշեն համայնքի բնակիչների հետ հանդիպման ժամանակ:

Չենք անդրադառնում Հայկ Մարությանի ներկայացրած ծրագրերին՝ հակաքարոզչություն չիրականացնելու համար, այլ պարզապես մեջբերում ենք նրա հերթական չմտածված արտահայտություններից մեկը:

«Ես չեմ ուզում, որ Նուբարաշեն ասելով՝ հիշենք աղբանոցը, գժանոցը, բոլոր «-ոցերը»...»:

Իհարկե, նրա այս արտահայտությունը լրիվ արդարացված կլիներ, եթե, օրինակ, այս կոմիկ դերասանը խաղալիս լիներ ի դերը՝ հումորային մանրապատումների ժամանակ (ինչը եղել է):

Հայկ Մարությանը՝ որպես Կարգին Հայկո, իհարկե, կարող է իրեն թույլ տալ և՛ հոգեբուժարանին ասել գժանոց, և՛ գժի դեր խաղալ, և՛ այլ հայտարարություններ ու արտահայտություններ անել, բայց, որպես քաղաքական գործիչ, եթե իհարկե այս խեղկատակն իրեն գործիչ է համարում, Մարությանն իրավունք չունի վրիպելու և պետք է ավելի կոռեկտ արտահայտվի: Բայց նրան կարծես թե չեն էլ մտահոգվում իր կողմից արված անվայելուչ կա՛մ անպարկեշտ, կա՛մ ոչ տեղին, կա՛մ անհարգի արտահայտությունները: Հավանաբար, մտածում է, որ միայն Նիկոլ Փաշինյանի առկայության գործոնն իր «բլթոցները կջրի-կգնա»...

Ի՞նչ է նշանակում՝ «Նուբարաշենը միայն գժանոցը չէ»...

Նախ չենք քննարկում այն, որ այդպես Մարության Հայկը վիրավորում է և՛ նուբարաշենցիներին, և՛ հոգեբուժարանում գտնվող մարդկանց: Այս տակավին երիտասարդը պետք է հասկանա, որ պարզապես չի կարելի հոգեբուժարանն անվանել գժանոց, որ նա դրա իրավունքը չուներ. այն էլ՝ հարթակից, այն էլ՝ որպես քաղաքապետի թեկնածու, այն էլ՝ որպես գործիչ ու, ի վերջո, նա վրիպելու իրավունք չուներ այն հասարակության, այն մարդկանց առաջ, որոնցից գուցե շատերի հարազատների հոգեկանը, տարբեր պատճառներով, խեղվել է: Ի դեպ՝ նրա բառով ասած՝ «գժանոցում» ճնշված մարդիկ են՝ ճնշված սոցիալական վիճակից, պետությունից, մարդկանցից և հենց հայկոներից... մարդիկ են, ովքեր բուժման, խնամքի, ուշադրության ու պետական, կառավարության հոգածության կարիքն ունեն... բայց, պարզվում է՝ նոր ձևավորվող կառավարության ներկայացուցիչներից մեկն արդեն նրանց որակեց՝ «գիժ» ասելով. դա նորմալ չէ, դա սխալ է, դա հարիր չէ պաշտոնյային:

Հայկոն, ի վերջո, պետք է հասկանա, որ սա բեմ չէ, թատրոն չէ, ֆիլմ չէ ու առավելևս՝ հումորային մանրապատում չէ, ու իր արտահայտություններում ավելի կոռեկտ պետք է լինի:

Իսկ եթե հիմա կգտնվի որևէ մեկը, ով քարը կվերցնի հարվածելու այս քննադատության համար, և կսկսի արդարացնել Կարգին Հայկոյին՝ թո՛ղ մի պահ կանգ առնի ու պատաասխանի այս հարցին.

Ի՞նչ կաներ ինքը, եթե իրեն ինչ-որ մեկը «գիժ» անվաներ... պատասխանը մեկն է՝ կհակադարձեր:

Դե ուրեմն արդա՛ր եղեք ու պատասխանեք՝ հիմա ո՞վ է գիժը...

Արմինե Մկրտումյան