Նիկոլ Փաշինյանը՝ ի պատասխան Ալիևի հայտարարության

Ես բազմիցս պատրաստակամություն եմ հայտնել լիարժեք ներգրավել բանակցային գործընթացի մեջ և ասել եմ, որ ինձ իրավասու եմ համարում բանակցել ՀՀ-ի անունից, որովհետև ՀՀ վարչապետն եմ և իրավասու չեմ համարում ինձ բանակցել Արցախի Հանրապետության անունից, որովհետև ԱրցախիՀանրապետության նախագահը և վարչապետը չեմ: Այդ մասին Ազգային ժողովում կառավարության հետ հարցուպատասխանի ժամանակ ասաց վարչապետ Նիկոլ Փաշինյանը՝ պատասխանելով Հանրապետական խմբակցության պատգամավոր Տաճատ Վարդապետյանի այն հարցին, թե ինչպե՞ս կմեկնաբանի Ադրբեջանի նախագահի հայտարարությունն այն մասին, թե՝ բանակցությունների խոչընդոտի պատասխանատվությունն ընկնում է ՀՀ վարչապետի վրա: 

«Կարևոր է նաև արձանագրել, որ Արցախի ժողովուրդը չի մասնակցում Հայաստանում իշխանության ձևավորմանը, որովհետև նրանք ունեն իրենց սեփական իշխանությունը, կառավարությունը, ընտրությունները, Ազգային ժողովը, նախագահը, որը և իրավասու է բանակցել Լեռնային Ղարաբաղի Հանրապետության անունից»,- ասաց Փաշինյանը՝ հավելելով, որ ասվածի մեջ ոչ մի սենսացիոն բան չկա:

«ԵԱՀԿ ՄԽ համանախագահող երկրների նախագահների հայտարարությունում նաև ընդգծվում է Արցախի վերջնական կարգավիճակի առումով Արցախի ժողովրդի կամարտահայտման անհրաժեշտությունը: Այդպիսով արձանագրված է Արցախի՝ հակամարտության կողմ լինելու հանգամանքը, և մենք շատ պարզ հարց ենք դնում: Մենք բանակցում ենք՝ ուղղակի բանակցելու՞, թե՞ հարցը լուծելու համար: Եթե մենք բանակցում ենք հարցը լուծելու համար, ապա ինչպե՞ս ենք պատկերացնում հարցի լուծումը՝ առանց հակամարտության կողմի, եթե մենք բանակցում ենք բանակցելու համար, ապա մենք պատրաստ ենք նաև այդպիսի ֆորմատով բանակցել: Քանի դեռ, սակայն, չի արձանագրվել Արցախի ժողովրդի ներկակայացուցչի անհրաժեշտությունը, նշանակում է՝ մենք չենք մոտեցել հարցի կարգավորմանը»,- նկատեց Փաշինյանը:

Ըստ վարչապետի՝ բանակցային գործընթացին ամենաշատը խանգարում է այն ռազմաշունչ մթնոլորտը, որը հաստատվում է Ադրբեջանի ղեկավարության ոչ կառուցողական գործողությունների և հռետորաբանության պատճառով.

«Վերը նշվածի համատեքստում ես վերահաստատում եմ բանակցությունների գործընթացին լիարժեք ներգրավվելու պատրաստակամությունս, և չկա դեպք, որ առաջարկվել է բանակցել և Հայաստանը հրաժարվել է դրանից»: 

Տաճատ Վարդապետյանն արձագանքեց, որ սա Ալիևի հերթական մերկապարանոց հայտարարությունն է և որ միջազգային հանրությունը ևս պետք է որ համամիտ լինի Փաշինյանի հետ:

«Ես այստեղից հայտարարում եմ, որ հիմա էլ պատրաստ եմ բանակցային գործընթացում լիարժեք ներգրավվել և չի եղել, որևէ առաջարկ, որ ես մերժեմ, ես ասել եմ, որ ոչ ֆորմալ շփումների առումով հունիսի 14-ին ՌԴ նախագահ Վլադմիր Պուտինն առաջարկեց, որ ինձ ու Իլհամ Ալիևին ծանոթացնի, ես այդ առաջարկն ընդունեցի, մենք ծանոթացանք, սակայն որևէ բովանդակային քննարկում տեղի չունեցավ»,- պատասխանեց Փաշինյանը: