Արթուր Պետրոսյանի «Կայզեր» սուպերմարկետների ցանցը շարունակում է «քցել» սպառողներին. պատկան կառույցներն այստեղ անելիք ունեն

Թավշյա հեղափոխությունից հետո հայ հասարակությունը սպասում էր, որ այսուհետ ապրելու է արդար և ազնիվ Հայաստանում, սակայն արի ու տես, որ ՀՀԿ-ական որոշ օլիգարխներ կամ նրանց մերձավոր ազգակից-բարեկամներն, այդպես էլ չսովորեցին քաղաքացուն չխաբելը:

Պարզվում է` գործարար Սամվել Ալեքսանյանի բիզնես դասերը շատ լավ սերտած նրա քրոջ որդին՝ Արթուր Պետրոսյանը, իրեն պատկանող «Կայզեր» սուպերմարկետների ցանցում դեռևս բանեցնում է ալեքսանյանական մեթոդներն' ապացուցելով, որ թավշյա հեղափոխությունն ու ազնիվ աշխատելն իրենց ուղեղների համար անընկալելի և շատ բարդ երևույթ է:

Օրերս NEWSPRESS.am-ի խմբագրություն դիմած քաղաքացին հայտնում էր, որ «Կայզեր» սուպերմարկետից գնել է իբրև թե ժամկետի մեջ գտնվող սնունդ, բայց պարզել է, որ վճարել է ժամկետանց, հնի վրա նոր ժամկետ փակցրած թթվասերի և երշիկի համար, որոնք ուտելուց հետո ստիպված է եղել դիմել բժիշկների օգնությանը:

Քաղաքացին հայտնեց, որ երշիկի և թթվասերի մնացորդը տարել է լաբորատորիա՝ փորձաքննության, որի արդյունքներն ստանալուն պես կդիմի սննդամթերքի անվտանգությունն ապահովող պատկան մարմիններին՝ պահանջելով ձեռնարկել օրենքով սահմանված կարգով համապատասխան միջոցառումներ:

Սա քաղաքացուն «քցելու» դասական օրինակ է, որից դեռևս ձերբազատվել չի կարողանում Արթուր Պետրոսյանը: 

Նշենք, որ սա այս սուպերմարկետների ցանցում սպառողներին խաբելու միակ տարբերակը չէ. նրանց մոտ շատ լավ աշխատում է նաև զեղչով վաճառվող ապրանքը չզեղչված գնով վաճառելու մեխանիզմը:

«Կայզեր» սուպերմարկետներում զեղչերի անվան տակ մոլորության մեջ են գցում սպառողներիս: Գնում ես իբրև թե զեղչված գնով ու հետո պարզում, որ դրամարկղում այն անցել է չզեղչված գնով»,-ասաց քաղքացին:

NEWSPRESS.am-ը խնդրի վերաբերյալ հրավիրում է ՀՀ Տնտեսական մրցակցության պաշտպանության պետական հանձնաժողովի, Սննդամթերքի անվտանգության պետական ծառայության և սպառողների շահերի պաշտպանությամբ զբաղվող ՀԿ-ների ուշադրությունն՝ առաջարկելով օրենքով սահմանված լիազորությունների շրջանակում դիտանցման խմբեր գործուղել «Կայզեր» սուպերմարկետների ցանց՝ սպառողների շահերը ոտնահարելու՝ վերը նշված տարբերակները բացահայտելու և բացառելու համար: