«Առանց Արթուր Ասատրյանի դժվար է, բայց նրա բարեգործությունները շարունակվում են»․ Էջմածնի մարզադահլիճը Դոն Պիպոյի խոստումն էր (ֆոտո)

Էջմիածնի Մ.Մաշտոցի անվան թիվ 1 հիմնական դպրոցում բացվեց գեղեցիկ կահավորված ու ամբողջովին նորոգված մարզադահլիճ։

Շինարարական աշխատանքները սկսվել են հունիսի 1-ին և ավարտվել օգոստոսի 31-ին։ 3 ամսվա ընթացքում նորոգվել են մարզադահլիճը, սանհանգույցը, տեղադրվել են ժամանակակից լոգարաններ (կաբինաներ), մասամբ վերանորոգվել և նաև ձեռք է բերվել ամբողջովին նոր գույք։

Այս ամենն իրականացվել է «Արթուր Ասատրյան» բարեգործական հիմնադրամի հովանավորությամբ, որի համար ծախսվել է շուրջ 20 մլն դրամ։

Նախաձեռնությունը եղել է հիմնադրամի նախագահ Արթուր Ասատրյանինը, ով հայտնի է Դոն Պիպո անունով։ Նա, ամիսներ առաջ տեսնելով մարզադահլիճի անմխիթար վիճակը՝ խոստացել է արձակուրդների ընթացքում վերանորոգել այն ու որպես սեպտեմբերմեկյան նվեր՝ մատուցել երեխաներին։

Ու թեև այդ ընթացքում Արթուր Ասատրյանը կալանավորվեց ու մինչ օրս, ինչպես նրա փաստաբանն է նշում, կալանավայրում գտնվում է անօրինական հիմքով, սակայն նրա սկսած գործը հասցվել է ավարտին, քանի որ դա մարզիկներին ու նրանց ծնողներին տրված խոստում էր։

Հիմնադրամի նախագահի օգնական Լևոն Ավետյանը NEWSPRESS.am-ի հետ զրույցում նշեց, որ թեև դժվար էր առանց Արթուր Ասատրյանի, և նրա հետ որևէ կապ չկար գործի ընթացքը ներկայացնելու համար, սակայն հաջողվեց։

«Հիշում եմ՝ ինչպես Արթուր Ասատրյանի և քաղաքացիների հանդիպման ժամանակ մարզիկների ծնողներն ասացին, որ շատ վատ պայմաններ են: Քանի որ Արթուր Ասատրյանը սպորտսմեն է, փորձում է Էջմիածնում և հարակից գյուղերում իր լուման ներդնել սպորտի զարգացման գործում՝ մարզական ակումբներ ու դահլիճներ ստեղծելով, որպեսզի պատանիները կարողանան զբաղվել սպորտով»,- ասաց Լևոն Ավետյանը։

Սա արդեն երկրորդ դպրոցն է, որտեղ «Արթուր Ասատրյան» հիմնադրամը վերանորոգում է մարզադահլիճը։ Լևոն Ավետյանի խոսքով՝ ցուցակում էլի նմանատիպ դպրոցներ կան, և ըստ առաջնահերթության ու կարիքի գնահատման, վերանորոգվելու են բոլորը. դա հենց Ասատրյանի ծրագիրն է։

«Առանց Արթուր Ասատրայնի դժվար կլինի, քանի որ գործ սկսելուց առաջ և դրա ընթացքում նրա հետ խորհրդակցում ենք՝ կապված ձևավորման հետ․ նա հետաքրքիր լուծումներ էր առաջարկում։ Այս պահին նաև խաղահրապարակների կառուցման աշխատանքներ են ընթանում։ Իհարկե, առանց նրա այդ աշխատանքները ոչ մի օր չեն կանգնել, բայց մի քիչ դժվարանում ենք, քանի որ ծրագրերն ու անելիքները շատ են»,-ասում է Լևոն Ավետյանը։