Մարդուն տանել, 3 տարի ազատազրկման դատապարտել, ընդամենն այն բանի համար, որ խոստացել է, որ քեզ կողմ կքվեարկի, ճի՞շտ է. Գևորգ Պետրոսյան

Այստեղ չկա մեզանից մեկը, ով դեմ չլինի ընտրակաշառքին և ընդհանրապետս ընտրությունների ներդաշնակությունը խաթարող նմանատիպ դրսևորումներին: Այդ մասին այսօր Ազգային ժողովի արտահերթ նիստում ասաց  Ազգային ժողովի «Ծառուկյան դաշինք» խմբակցության պատգամավոր Գևորգ Պետրոսյանը: ԱԺ օրակարգում ընտրախախտումների համար պատիժների խստացման հարցն է:

«Բայց չի կարելի, ինչպես ժողովուրդն է, ջրից դուրս գալ, կրակն ընկնել: Իսկապես կա նպատակը՝ ընտրությունները զերծ պահել նման միջամտություններից, բայց չի կարելի այդ զերծ պահելն անել ավելի կարևոր շահեր ոտնահարելու կամ ոտնահարման իրական սպառնալիքի տակ դնելու հաշվին: Իսկապես այսօր այս առկա իրավակարգավորումն ուղղակիորեն սպառնում է քաղաքացու շահերին, այսինքն՝ քաղաքացին կարող է չիմացաբար, կա՛մ ինչ-որ ազդեցության տակ ընկնելով, կա՛մ պատահական, րոպեական թելադրանքով խոստանալ, որ եթե դու գաս, այսինչ օրն ինձ հանդիպես, ես քեզ կողմ կքվեարկեմ կամ քո կողմից առաջարկվող թեկնածուին»,- ասաց պատգամավորը:

Պետրոսյանը հարց բարձրացրեց, թե արդյոք դա ճի՞շտ վարչարարություն է. «Մի՞թե սա ճիշտ քրեական քաղաքականություն է պետության կողմից, ընդ որում՝ բավականին ազդեցիկ սանկցիա են նախատեսում: Մարդուն տանել, եթե չեմ սխալվում, 3 տարի ազատազրկման դատապարտել՝ ընդամենն այն բանի համար, որ խոստացել է, որ քեզ կողմ կքվեարկի: Եվ, ընդհանրապես, սա հակասում է քրեական իրավունքի գիտությանը և ընդհանրապես քրեական իրավունքի գիտությունը չի թույլ տալիս, որ մարդկանց մտքերի, մտադրությունների համար ենթարկել քրեական պատասխանատվության և նաև խոստումը հավասարեցված է կաշառք ստանալուն: Այստեղ նույնպես խախտված է արարքի նկատմամբ համարժեք պետաիրավական մոտեցում ցուցաբերելու սկզբունքը»,- եզրափակեց պատգամավորը: