ԱԱԾ-ի «մասկի-շոուն» ավարտվեց

ԱԱԾ տնօրեն Արթուր Վանեցյանն ի սկզբանե ճիշտ չի համարել իրենց աշխատանքը հրապարակայնացնելը, բայց ասում է, հանգամանքներն են ստիպել։

Նա լրագրողների հետ զրույցում նշել է, թե հասարակության հետաքրքրությունը մեծ է եղել, ու փաստորեն նրանց հրապարակային «մասկի-շոուն»-ներն այդ  հետաքրքրությունն են բավարարել։

Արթուր Վանեցյանը, պատասխանելով հարցին, թե ինչու է ձերբակալությունների թիվը նվազել, և ինչո՞ւ է ԱԱԾ-ն վերջին շրջանում հանգիստ, ասել է․

«Ո՛չ թե ԱԱԾ-ն վերջին շրջանում հանգիստ է, այլ չի հրապարակում իր կողմից իրականացվող բացահայտումները: Կամաց-կամաց, խնդրում եմ, սովորե՛ք, որ ես էլ չեմ երևալու, ինտերվյու չեմ տալու: Գործերի մասին ասելու եմ, բայց թույլատրելիի սահմանում»։

Այն, որ ԱԱԾ տնօրենի պաշտոնը չպետք է այդքան հրապարակային լինի, կառավարությունում, իհարկե, այս պահին չիմացան։ Պարզապես այն ժամանակ հարկավոր էր մարդկանց ցույց տալ, որ անմիջապես նոր իշխանությունը գործի է անցել, և դա Վանեցյանը փաստորեն չի էլ ժխտում։

Մյուս կողմից էլ՝ ԱԱԾ-ի հանգստությունն այլ բացատրություն ունի։

ԱԱԾ-ն այլևս անելիք չունի։ Վերջին հաշվով, նրանց, ում ԱԱԾ-ն ձերբակալեց, այսօր ազատության մեջ են, այսինքն՝ այս մարդկանց կրկին ձերբակալելն անիմաստ է դառնում, իսկ այլ «թեկնածուներ», գոնե այս պահին, կառավարությունը չունի։

Եթե ունենար, ապա կշտապեր նրանց բերման ենթարկել, հատկապես երբ նոր իշխանությանը հավատացողների թիվն ամեն օր նվազում է, իսկ դա նրան հնարավորություն կտար մարդկանց շրջանում կրկին հույսի նշույլներ արթնացնել։

Մի խոսքով՝ ԱԱԾ-ի «մասկի-շոուն» ավարտվեց։