«Մեր թմի դեմ խաղ չկա»․ ինչքան ուզեք՝ կխփե՞ք

Միջազգային խոշորագույն լրատվական կառույցների՝ SEEMO-ի IPI-ի խորհուրդների անդամ, NEWSPRESS.am-ի հիմնադիր-տնօրեն Արմենուհի (Արիանա) Հովսեփյանը ֆեյսբուքյան իր էջում գրել է․

«Մեր թմի դեմը խաղ չկա։ Այդ մասին իր ելույթում ասել է Երևանի քաղաքապետի թեկնածու, «Իմ քայլը» դաշինքի առաջնորդ Հայկ Մարությանը։ 

Հիմա խնդրում եմ նորից կարդալ առաջին նախադասության երկրորդ բառը՝ թմի։ Սա մեր տառասխալը չէ, սա այն է, ինչ բառացիորեն ասել է Կարգին Հայկոն։ Այս արտահայտությունը մոտավորապես հիշեցնում է Սերժ Սարգսյանի հայտնի արտահայտությունը՝ ինչքան ուզենք, էդքան կխփենք։ Եթե Սերժ Սարգսյանի արտահայտությունը ժողովրդին չզարմացրեց, որովհետև բոլորը գիտեին, որ Հանրապետականն իր պիկի տարիներին, իսկապես, ինչքան ուզում խփում էր, որովհետև կար հայտնի թվանկարիչ Մուկուչյանը, ապա Հայկոյի այս «ճոռոմ» արտահայտությունն առնվազն զարմացնող էր։ Հիմա անդրադառնանք Հայկոյի այսչափ ինքնավստահությանը։

Ինչո՞վ է վստահ Մարության Հայկը, թե անձամբ իր դեմ խաղ չկա։ Ոստիկանությունը, ֆինանսական ու վարչական ռեսո՞ւրսն են գործի դնելու, Փաշինյանի վարկանի՞շն է իրենը համարում, թե՞ հույսը նույն ու նախկին Մուկուչյանն է, ում հրաժարականը թերևս միայն Անդրիաս Ղուկասյանը պահանջեց, ում կինը՝ Անահիտ Թարխանյանը, ըստ էության, Հայկոյի մրցակիցն է ավագանու ընտրություններում։ Թե նախկինում ընտրություն էր կեղծվում, ապա ինչո՞ւ այժմ Մուկուչյանի հրաժարականն այլ պահանջող չկա։ Թեկուզ նույն ինքը՝ Հայկոն, դուրս գա, բղավի, թե ուզում է, որ ընտրություններն արդար անցնեն, իսկ Հանրապետականի օգտին կեղծ նկարչություն արած ԿԸՀ նախագահը հեռանա։ 

Ինչո՞ւ եմ ասում «իր դեմ»։ Որովհետև թերևս շատ իսկապես կարգին մարդիկ կան այդ ցուցակում, ովքեր կարող էին գլխավորել ցուցակն ու կարգին քաղաքապետ դառնալ։ Ի վերջո, մի պահ կանգ առնենք ու հարց տանք։ Ո՞վ է, ի վերջո, Հայկ Մարությանը և ի՞նչ կլինի արած ժողովրդի համար։ Բարեգործությո՞ւն։ Տեսախցիկներով բարեգործությունը, պարոնա՛յք, այլևս բարեգործություն չէ, այլևս ինքնագովազդ է, որ մի օր, թեկուզ, քաղաքապետ «սարքվես»։ Ի՞նչ է արել Հայկը, դպրոցահասակներին ու ընդհանրապես մի ամբողջ սերունդ կարգինսերիալների մակարդակի իջեցնելուց, ամեն ինչի ծափահարել սովորեցնելուց բացի։ Թերևս ոչինչ։ Հայկն էր, որ իր հայտնի արտահայտությամբ՝ իրարից զզվել էր սովորեցնում։ 

Բացի «մեր թմի դեմ խաղ չկայից», թերևս այլևս անկարգ Հայկը հասարակությանը սև ու սպիտակի է բաժանել, բնականաբար՝ հետո նաև արդարանալով։ Ո՞ւմ նկատի ունի Հայկոն, թե մենք պայքարում ենք ուժերի դեմ, ովքեր քանդել են երկիրը։ Հանրապետականների՞։ Տեղյակ չէ՞ նույն Հայկոն, որ Հանրապետականն ինքնամաքրվել է առնվազն քաղաքապետարանից։ Ո՞ւմ նկատի ունի, երբ ասում է սև ուժեր, ասենք, Փաշինյանի «հարյուր տարվա» գործընկեր Զեյնալյանին ու Մարուքյանի՞ն, Փոստանջյան Զարուհո՞ւն, ով տառացիորեն կեղտաջուր էր լցնում Տարոնի վրա, Հովհաննիսյան Րաֆֆիի՞ն, Զոհրաբյան Նաիրայի՞ն, ով ամբողջ կյանքում քննադատել է իշխանություններին, Թարխանյան Անահիտի՞ն, Շահգելդյան Մհերի՞ն, մեկի՞ն, մյուսի՞ն։ Թերևս մի փոքր այլ է Դաշնակցության թեկնածուի պարագան։ 

Այժմ առավել քան ակնհայտ է, որ Կարգին Հայկոյի սերժսարգսյանական ոճով արտահայտությունը մի քանի հազար գիտակից ու մտածող մարդկանցով կրճատեց իր իսկ էլեկտորատը, իսկ շատերին հիշել տվեց հենց Հայկոյի արտահայտությունը՝ «Ո՜նց եմ ես ձեզնից զզվում»։ Ըստ էության, յուրաքանչյուրը, փաստորեն, ով իր ձայնը չի վստահի բեմի նախկին մեյմունին, սև է։ Ու նա դեռ իշխանության չէ, պատկերացնո՞ւմ եք, երբ քաղաքապետ դառնա։ Քաղաքը սպիտակներով մեջ-մեջ կանեն, սևերին էլ կուղարկեն գրողի ծոցը, ինչպես անում էր նախկին իշխանությունը։