Սպառնում եմ խաղաղ անհնազանդություն իրականացնել. Շահեն Հարությունյանը վարչապետին 2 ամիս ժամանակ տվեց (տեսանյութ)

Ո՞ւր է սերը եւ հանդուրժողականությունը կալանավորների նկատմամբ, եթե սիրո եւ համերաշխության հեղափոխություն է եղել. յուրաքանչյուր կալանավոր պետք է զգա հեղափոխության շուրջը, պետք է համաներում լինի այդ մարդկանց նկատմամբ: Այս մասին ֆեյսբուքյան ուղիղ եթերի ժամանակ հայտարարել է «Ցեղակրոն» կուսակցության առաջնորդ Շանթ Հարությունյանի որդին՝ Շահեն Հարությունյանը, ով պահանջում է իր վարչապետ Նիկոլ Փաշինյանից ուշադրություն դարձնել իր հոր գործին:

Շահեն Հարությունյանի խոսքով, պատգամավոր եղած ժամանակ Նիկոլ Փաշինյանը Շանթ Հարությունյանին քաղաքական բանտարկյալ է համարել, իսկ հիմա չի զբաղվում նման առաջնային հարցերով:

«Ես սպառնում եմ իշխանություններին՝ դուրս գալ եւ խաղաղ անհնազանդություն իրականացնել, հետո հանկարծ Նիկոլը չկանգնի ուղիղ եթերի ժամանակ, ասի՝ դա սաբոտաժ է մեր դեմ»,-նշել է Շահեն Հարությունյանը՝ ժամանակ տրամադրելով վարչապետ Նիկոլ Փաշինյանին զբաղվելու իր հոր հարցով մինչեւ նոյեմբերի 7-ը, երբ նախատեսված է Ֆրանկոֆոնիայի գագաթնաժողովը:

«Արժեքների հեղափոխություն արեք, պարո՛ն Փաշինյան, լուծե՛ք այս խնդիրները, երկիրը գնում է միակուսակցական դառնալու ճանապարհով, ով ձեր կուսակցությունից դուրս է, դառնում է ձեր թշնամին, անգամ ՀՀԿ-ականները չէին ասում «Հանրապետական» եւ վերջ: Մեր ժողովուրդը դեգրադացվում է ձեր «դուխով» մայկաների, գլխարկների միջոցով եւս: Նրանք հագնում են այդ գլխարկներն ու քարկոծում տարակարծիք ունեցող մարդկանց»:

Նա նաեւ հայտարարել է, որ իր հայրը բանտում շատ վատ պայմաններում է գտնվում:

Նշենք, որ «Շանթ Հարությունյան եւ ընկերներ» գործով շուրջ մեկ տասնյակ դատապարտվածներն արդեն ազատության մեջ են բացառությամբ՝ «Ցեղակրոն» կուսակցության առաջնորդ Շանթ Հարությունյանի: Շանթ Հարությունյանի պատժի ժամկետը լրանում է հաջորդ տարվա նոյեմբերի 5-ին:

Հիշեցնենք, որ քաղաքական-հասարակական գործիչ Շանթ Հարությունյանը 2013թ. նոյեմբերի 5-ին «Անոնիմուսների երթ» էր նախաձեռնել։ Սակայն Մաշտոցի պողոտայում տեղի էին ունեցել բախումներ, ոստիկանները բերման էին ենթարկել 38 ակտիվիստների, ձերբակալվել 14-ին: Նրանց առաջադրվել էր խուլիգանության մեղադրանք: