Լավաշի վրա չե՛ն կարող՝ տոպրակի վրա նկար կդնեն. Փաշինյանն ընտրակաշառքի տարբերակ հուշեց

Կառավարությունն առաջարկում է խստացնել պատասխանատվությունը ընտրակաշառքի համար՝ այն վարչական իրավախախտումների օրենսգրքից տեղափոխելով քրեական օրենսգիրք և նախատեսելով ոչ միայն տուգանք, այլև ազատազրկում:

Այդ մասին կառավարության այսօրվա նիստում հայտարարեց Արդարադատության նախարար Արտակ Զեյնալյանը՝ ներկայացնելով ՀՀ համապատասխան օրենքների փոփոխված նախագիծը, որը կանոնակարգում է խնդիրը:

Զեյնալյանն առաջարկեց ապաքրեականացնել ընտրակեղծիքի մասին անփութությամբ սուտ մատնություն տալը, որ մարդիկ չվախենան ընտրակեղծիքի մասին հաղորդում տալ: 

Նախագծով նախատեսվում է նաև քրեական պատասխանատվությունից ազատել կաշառք ստացող անձին, եթե նա, մինչև կաշառք ստանալը, այդ մասին իրավապահ մարմիններին տեղյակ է պահել:

Վարչապետ Նիկոլ Փաշինյանն էլ, գնահատելով նախագիծը, նշեց, որ այն կարևոր է հատկապես առաջիկա ընտրություններում. «Երևանի ավագանու ընտրությունները շատ կարևոր քննություն է մեզ համար, և մենք այդ քննությունը պետք է գերազանց ստանանք»,- ասաց նա:

ԿԳ նախարար Արայիկ Հարությունյանը նկատեց, որ նշված է, թե ընտրակաշառք չեն համարվելու ընտրությունների համար նախապատրաստված հուշանվերները:

Արձագանքելով ԿԳ նախարարին՝ Փաշինյանը նկատեց. «Մեր պատմական փորձը հաշվի առնելով՝ երեք հազար դրամը բավականին գումար է կուսակցության նշանով լավաշ կամ մուրաբա կամ ալյուրի պարկ բաժանելու համար. կամ ենթադրենք՝ երեք հազար դրամ դնեն տոպրակի մեջ կուսակցության նշանով բաժանեն, կամ երեք հազար դրամով դիզվառելիք՝ թեկնածուի պատկերով: Ձևակերպումը տարընթերցման տեղիք է տալիս, պետք է հստակ նշվի այդ սահմանը: Եկեք չթերագնահատենք ընտրակեղծարարների կրեատիվ միտքը: Պետք է հստակ նշվի, որ խոսքը գրիչի, բուկլետի, նախընտրական գլխարկի, շապիկի և նմանատիպ ապրանքների մասին է»,- ասաց Փաշինյանը: 

Արտակ Զեյնալյանն այս միտքն այնքան էլ խելամիտ չհամարեց՝ նշելով, որ, օրինակ, լավաշի վրա չեն կարող ինչ-որ մեկի պատկերը դաջել:

Սակայն Փաշինյանը նրա հետ չհամաձայնեց. «Ինչի՞ չեն կարող. լավաշի վրա չեն կարող՝ տոպրակի վրա նկար կդնեն. լավաշը կդնեն տոպրակի մեջ, պատկերն էլ կկպցնեն: Վրան էլ կգրեն՝ ոչ միայն հացիվ»:

Արտակ Զեյնալյանն էլ նկատեց, որ դա արդեն բարեգործության տակ է անցնում և խոստացավ այդ հարցը վերանայել: