Ոչ թե պատրաստվում է, այլ՝ վերադարձել է և խոստանում է թարմացնել որոշների հիշողությունը

ՀՀ երկրորդ նախագահ Ռոբերտ Քոչարյանը հարցազրույց է տվել ռուսական НТВ հեռուստաալիքին:

Լրագրողի հարցին՝ «Դուք առաջինն եք նախկին սովետական երկրների ղեկավարներից, որ քաղաքական ձերբակալման սպառնալիքի ներքո չլքեց երկիրը, ինչպես դա տեղի ունեցավ Վրաստանի, Ուկրաինայի, Ղրղզստանի դեպքում», Ռոբերտ Քոչարյանը պատասխանել է. «Ես Հունաստանում էի, տեղեկացրի իմ վերադարձի օրվա մասին՝ հստակ գիտակցելով, որ կարող եմ ձերբակալվել: Ակնհայտ է, որ իմ տեսակի մարդիկ չեն փախչում դժվարություններից: Բայց հույս կար, որ դատաիրավական համակարգը գործադիր իշխանության ենթակայության տակ չէ, և դատարանների անկախություն ինչ-որ չափով գոյություն ունի: Ես եկել եմ պայքարելու իմ պատվի ու արժանապատվության համար»:

Այն, որ ինքը պատրաստ է պայքարելու՝ Ռոբերտ Քոչարյանը հայտարարել էր նաև հայաստանյան մեդիաներից մեկի հետ հարցազրույցում, և, հաշվի առնելով այն, ինչ կատարում է Քոչարյանն, ակնհայտ է դառնում, որ այդ պայքարը թեժ է լինելու:

2-րդ նախագահը ջանք ու եռանդ չի խնայում մեդիաներ գնելու համար, որոնք արտահերթ խորհրդարանական ընտրություններին տեղեկատվական պատերազմի մեջ կմտնեն ոչ քոչարյանական մեդիաների հետ:

Քոչարյանն արդեն ունի Հանրապետական և Դաշնակցություն կուսակցությունների աջակցությունը, թեև դեռևս համառորեն լռում է՝ չտալով հարցի պատասխանն՝ իսկ ինքն ունի՞ արդյոք Հանրապետականի կամ Դաշնակցության աջակցության կարիքը:

Լրագրողի հարցին՝ ունի՞ արդյոք քաղաքական հենարան, էքս նախագահը պատասախանեց, որ ինքը 10 տարի եղել է ՀՀ նախագահը և այն, ինչ կառուցված է Երևանում, դրանց հիմքերը դրվել են հենց իր պաշտոնավարման ժամանակահատվածում, հետևաբար, բոլոր նրանք, ովքեր իր նախագահության ընթացքում բիզնեսներ են ծավալել կամ մասնակցել են տնտեսության զարգացմանը, կդառնան իր քաղաքական հենարանը:
Քոչարյանն անգամ շեշտեց՝ իսկ եթե որոշ մարդկանց մոտ հիշողությունները թարմ չեն, ապա կհիշեցնի դրա մասին:

Քոչարյանի այս հիշեցումն ակնարկ էր՝ ուղղված իր պաշտոնավարման ժամանակաշրջանում բիզնես-գործունեություն ծավալած և պետական ապարատի հաշվին հարստացած գործարարներին: Քոչարյանն НТВ-ի եթերից ձեռնոց նետեց իր օրոք հարստացած բիզնեսմեններին՝ տողատակում ունենալով՝ «եթե չհամագործակցեք՝ գործի կգցեմ կոմպրոմատների մեխանիզմը»:  Իսկ կոմպրոմատներ՝ Քոչարյանն ունի՝ ինչքան ուզեք:

NEWSPRESS.am