«Ես հակակոռուպցիոն միջոցառումը չեմ պատկերացնում»․ Թորոսյանը բուժաշխատողին չի կարող ասել՝ հիվանդից գումար մի՛ վերցրու

Մենք պետք է անենք, մենք տեղյակ ենք, մենք ուզում ենք․․․

Մոտավորապես այս հնչերանգով տրվեցին բոլոր այն հարցերի պատասխանները, որոնք «Ազատություն» ռադիոկայանի ֆեյսբուքյան եթերի միջոցով ուղղվեցին Առողջապահության նախարար Արսեն Թորոսյանին։

Նա հիմնականում բոլոր հարցերին տալիս էր ոչինչ չասող և, ըստ էության, շրջանցող պատասխաններ։

Այս շարքում ուղիղ եթերին հետևողներից մեկը հարցրեց նախարարին հիվանդանոցներում տիրող կոռուպցիոն երևույթների մասին, թե ե՞րբ դրանք վերջապես կվերանան։

Օգտատերը մասնավորապես նշել էր, որ վերջերս մանկական հիվանդանոցում մատուցած ծառայության դիմաց բուժաշխատողն իրենից գումար է պահանջել։

«Գիտե՞ք՝ ես միանշանակ չեմ կարող ասել, թե երբ դրա դեմ պայքար կլինի, քանի որ այսօր շատ բուժաշխատողներ մինիմալից ցածր աշխատավարձ են ստանում։ Նրանք որևէ կերպ պետք է լրացնեն այդ բացը։ Ես հակակոռուպցիոն միջոցառումը չեմ պատկերացնում, եթե պետությունը վիրահատության համար հատկացնում է զուտ պահանջվող գումարը և դրանից բժշկին ոչինչ չի մնում»,- ասաց Արսեն Թորոսյանը՝ հավելելով, որ կան նաև հավելյալ ծառայություններ, որոնք նախանշված գումարի մեջ ընդգրկված չեն։ 

Թեև հարկ է նկատել, որ խոսքն ամենևին էլ այդ մասին չէ, այլ այն «մաղարիչի», որը հիվանդները տալիս են պետպատվերից, ծառայությունների դիմաց սահմանված վճարի ու ու հավելրալ վճարումներից զատ, բայց Թորոսյանը կոնկրետ պատասխան տալու փոխարեն՝ ոչ միայն ընդհանրացրեց հարցը, այլև, ըստ էության, արդարացրեց կոռուպցիան հիվանդանոցներում։

Սա մոտավորապես հիշեցրեց նախորդ նախարարի՝ Լևոն Ալթուրնյանի «մաղարիչը» օրինական դարձնելու մտահղացումը։ Զերծ ենք մնում ավելորդ մեկնաբանություններից, հավելենք միայն, որ Արսեն Թորոսյանը նշեց, որ այս հարցը կկանոնակարգվի այն ժամանակ, երբ կբարձրանա բուժաշխատողների աշխատավարձը։

Իսկ թե ե՞րբ՝ չի մանրամասնում․ ծրագրում կա․․․