Երևանի քաղաքապետի թեկնածուների «դուխը» և աղբով լցված քաղաքը (լուսանկարներ)

Երևանի աղբանության խնդիրը նոր չէ ի հայտ եկել․ այն եղել է, կա ու հնարավոր է գործի նման ընթացքի դեպքում, մնա բոլոր ժամանակների օրակարգային հարցը։

Հատկապես «նոր» Հայաստանում, թվում էր, թե ամեն ինչ իր տեղն է ընկնելու, բայց ստացվեց այնպես, որ մինչ շարժման «դուխով» մասնակիցներից շատերը կոչ են անում մյուսներին լինել համբերատար ու սպասել դրական փոփոխությունների, բայց դրանք, գոնե առայժմ, չեն երևում, իսկ մայրաքաղաքն էլ շարունակում է աղբով լցվել։

Աղբահեռացման հարցերով զբաղվող «Սանիթեք» ընկերությունը, թեև արդեն ներողություն է խնդրել պատճառած անհարմարությունների համար, բայց շարունակում է աղբը թողնել փողոցներում և ո՛չ միայն այնտեղ․․․

Երևանը կարծես վերածվել է աղբանոցի․ ամենուր թափված աղբ, աղբակույտերից հոսող ջրային գոյացություններ ու գարշահոտություն։

Անտերության մատնված քաղաքապետարանից դեպի քաղաքի փողոցներ հոսող գաղջն արդեն դառնում է անտանելի։ Եթե նախկինում նման բողոքների դեպքում քաղաքապետարանը մատ էր թափ տալիս «Սանիթեք»-ի վրա ու հիշեցնում քաղաքը մաքրելու նրա պարտավորությունները, ապա այսօր մատ թափ տվող չկա․ քաղաքապետի ժամանակավոր պաշտոնակատար, փոխքաղաքապետ Կամո Արեյանն իր հարցազրույցներից մեկում հիշեցրեց լրագրողներին, որ դա իր գործը չէ, այլ «Սանիթեք»-ի, ու այն խոստացել է մաքրել քաղաքը։ Այլ կերպ ասած՝ ԺՊ Արեյանը ձեռքերը լվացել է քաղաքը մաքրելու գործից, իսկ «Սանիթեք»-ն էլ, հավանաբար, նման անտարբերությունը տեսնելով՝ իրեն պարտավորված չի զգում։

Փոխարենը քաղաքում արդեն իսկ սկսել են ակտիվ քարոզարշավներ, ու թեև դեռ ընտրություններին բավականին ժամանակ կա, սակայն կուսակցությունները ժամանակ չեն կորցնում քաղաքապետի  իրենց թեկնածուին գովերգելու ու գովազդելու համար։

Մինչդեռ ամենամեծ գովազդը կլիներ այն, եթե նրանցից որևէ մեկը ստանձներ քաղաքն աղբից ազատելու պարտավորությունը, թեկուզ որպես «ընտրակաշառք»:

Արմինե  Մկրտումյան