Գաղջից մինչև Գալուստի «մջղավանջ»

Նոյեմբերի 18-ին  ողջ համացանցը ողողվեց մի տեսանյութով, որտեղ  իշխանությունների վարած քաղաքականության արդյունքում տուն ու տեղ կորցրած, արտագաղթած ընտանիքի հայրը առավոտ կանուխ կտրում է նախագահի  ճանապարհը և առանց վարանելու ասում` սահմանադրություն մի փոխեք, այլ Ձեզ փոխեք, ձեր ընտանիքը փոխեք:

Տեսանյութի շուրջ  քննարկումներն էլ առավել քան ակտիվ էին. ի վերջո մեկը համարձակություն ունեցավ ասելու` «թագավոր դու մերկ ես», ի վերջո մեկի շուրթերով հնչեց այն տեսակետը, որ շատերն են ուզում բարձրաձայնել, և ի վերջո հնչեց` ոչինչ «թարս» չի ասվել, պարզապես սոցիալական արդարության հարց է բարձրացվել:

Նույն օրը նախագահ Սերժ Սարգսյանը  Արմավիրի մարզպետի և մարզպետարանի պատասխանատուների հետ  խորհրդակցություն  անցկացրեց Արմավիրի մարզի 2014-2015 թթ հունվար սեպտեմբեր ժամանակահատվածի սոցիալ տնտեսական իրավիճակի, առկա հիմնախնդիրների գերակայությունների և զարգացման ծրագրերի քննարկման  նպատակով: Չի բացառվում որ առաջիկայում, մինչև սահմանադրության հանրաքվեն տարբեր մարզպետների հետ  նախագահը քննարկի  տվյալ մարզերի սոցիալական իրավիճակը:

Իրականում որևէ  մարզպետ իր տարբեր տրամաչափի տեղակալներով  ու աշխատակազմով  մինչ օրս որևէ  լուրջ հարց չի լուծել որևէ մարզի համար`  բացառությամբ  ընտրություններում իրենց մատուցած ծառայություններից:  Եվ պատահական չէ , որ մարզպետարանները, մի շարք այլ կառույցների նման, վերածվել են պորտաբույծ օղակների` մսխելով պետբյուջեից հսկայական գումարներ: Որևէ մեկը չի կասկածի, որ եթե պարազիտ այդ կառույցների վրա ծախսվող գումարները ուղղորդվեն հանրապետության ողջ տարածք, ապա վիճակն ավելի տանելի կլինի և իրականում կլուծվեն սոցիալ տնտեսական մի շարք խնդիրներ: Բայց իշխանությունը լավ գիտի` երբ, ուր և ինչի համար պետք գումարներ ծախսել:

Օրինակ յուրաքանչյուր մարզպետ այսօր ունի երեք տեղակալ, նրանք իրենց օգնակաները, հետո խորհրդականները  ու այսպես ռեսուրսը ձնագնդիի նման մեծանում է և այդ գունդը դառնում է իշխանության ամուր հենարան և ամեն ընտրությունից առաջ իշխանությանը ընտրաձայն մատուցելու վարչական լուրջ ռեսուրս:  Ու չի բացառվում, որ սոցիալ-տնտեսական հարցեր լուծելու ֆոնի վրա տարբեր գերզգայուն մարզպետներ առաջիկայում երկրի ղեկավարի հետ  քննարկեն սահմանադրության հանրաքվեի հարցը:

Ինչպես ասում են` գնդակը մարզպետների դաշտում է: Իսկ իրական սոցիալ-տնտեսական խնդիրները պետք չէ լսել մարզպետներից գոնե այս օրերին, քանի որ սահմանադրական սերիալի անվան ներքո իշխանության նազիր-վեզիրները  տարբեր մարզերում  հենց  առաջին աղբյուրից` ժողովրդից, տեղեկանում են իրական սոցիալական վիճակի մասին:

Օրինակ, երեկ գյումրեցի մի տիկին իշխանության ներկայացուցչին` Սամվել Ֆարմանյանին,  հարց է տալիս, թե այդ ինչպես է, որ Գյումրին Երևանից հեռու է 120 կմ-ով, բայց Երևանից հետ է 150 տարով: Մեկ այլ գյումրեցի էլ արտահայտվում է` չե’ք խփելու, Գյումրիում այս անգամ էլ չե’ք խփելու:  Ֆարմանյան էլ արդարացավ հանրապետական ավանդական ոճով` Լևոն Տեր-Պետրոսյանի օրոք էլ լավ չէր:

Իսկապես Լյովիկ Զուրաբյանի երջանիկ օրերից մինչև Ֆարմանյան Սամվելի  երջանիկ օրերը ոչինչ չի փոխվել. գումարելիներրը նույնն են, գումարն ու դրա չափն է տարբեր:  Ինչպես կասի Գալուստ Սահակյանը` «մջղավանջ է, մջղավանջ…»