Վանաձորյան բանկոմատները «սիրալիր մերժում» են․ «Արդշինբանկ»-ը խախտում է իր քարտապանների հետ կնքած պայմանագրերը

Այն, որ «Արդշինբանկ» ՓԲԸ-ի որոշ բանկոմատներ երկար ժամանակով կարող են չաշխատել՝ անհարմարություններ պատճառելով բաժանորդներին, արդեն նորություն չէ։ NEWSPRESS.am-ն արդեն անդրադարձել է նման «խափանումներին»։ 

Պարզվում է, նման դեպքերում, մարզերում վիճակն ավելի անմխիթար է։ Մասնավորապես Լոռու մարզկենտրոն Վանաձորում բանկոմատները «քմհաճույքով» են աշխատում, իսկ թե կոնկրետ ում՝ դա արդեն հարցի մյուս կողմն է։

Չի քննարկվում, որ Վանաձորրի105 000 բնակչության պարագայում գործում է Արդշինբանկի 2 մասնաճյուղ և ընդամենը 3 բանկոմատ։ Հարմարվենք այն մտքի հետ, որ քաղաքը փոքր է և ավելին հարկավոր չէ, սակայն հարկ է նկատել, որ այս բանկերն ու բանկոմատները համաչափ չեն տեղակայված․ նախ՝ երկու մասնաճյուղն էլ գործում է միևնույն փողոցի վրա՝ Գրիգոր Լուսավորիչ 38 և 54բ հասցեներում։ Բնականաբար բանկոմատներից երկուսը գտնվում են անմիջապես բանկերի հարևանությամբ, իսկ երրորդը՝ ավելի կենտրոնական մասում։

Չի քննարկվում նաև այն, որ գումար հանելու համար ծայրամասի բնակիչները ստիպված են հասնել քաղաքի կենտրոն։ Խնդիրն այն է, որ հասնելով կենտրոն՝ հնարավոր է քաղաքացուն այդպես էլ չհաջողվել կանխիկացնել գումարը։

Այդպես օրինակ, կիրակի օրը «Արդշին»-ի բանկոմատների աշխատանքը կաթվածահար էր եղել․ 3 բանկոմատից մեկը «սիրալիր զգուշացնում» էր, որ անսարքություններ կան և չի կարող սպասարկել, իսկ մյուս երկուսը գումար չէր կանխիկացնում, քանի որ անդորրագիր չէր կարող տպել․․․

Իհարկե քաղաքում կան էլի բակոմատներ, սակայն գաղտնիք չէ, թե որքան տոկոսներ են պահվում, այլ բանկերի բանկոմատներից պգտվելու դեպքում։ Մյուս կողմից էլ, հաճախորդն այդ պահին այլընտրանք չունենալով, ստիպված օգտվում է այլ բանկոմատից՝ «հարստացնելով» բանկիրներին։

Ներքին պայմանավորվածություն է սա, թե աշխատանքի վատ կազմակերպում, կարևոր չէ ու հաճախորդին դա չի հետաքրքրում։ Հաճախորդն ուզում է պարզապես պատշաճ սպասարկվել, ինչպես պայմանագրով է նախանշված, մինչդեռ «Արդշինբանկ»-ը շարունակում է նրան անհարմարություններ պատճառել՝ խախտելով անթերի սպասարկման իր պարտավորությունը և մնալով անպատիժ։