Փաստաբանը վստահում է իր պրակտիկային՝ Ռոբերտ Քոչարյանի գործը կկարճվի

ՀՀ երկրորդ նախագահի փաստաբան Ռուբեն Սահակյանի աշխատանքային փորձը ցույց է տվել, երբ միանգամից, առանց քննության մեղադրանք է առաջադրվում՝ գործը կարճվում է:

«Ռոբերտ Քոչարյանին մեղադրանք առաջադրվեց, գիտեք, որ հրավիրված էր, որպես վկա, բայց ասացին, որ որոշել են մեղադրանք առաջադրել ու հարցաքննել որպես մեղադրյալ: Իմ պրակտիկայում նման դեպք եղել է, ինձ էլ են մեղադրանք առաջադրել հենց միանգամից, հետո կարճել են հանցակազմի բացակայության պատճառով: Ես համոզված եմ, որ այս գործը կունենա նույն վախճանը»,-ասաց փաստաբանը:

Նա նշեց, որ քննիչի հայտարարությունից հետո Քոչարյանը ցուցմունք չի տվել, թեև իրենք պատրաստվել էին ցուցմունք տալ: Նա հայտարարեց նաև, որ լավ ծանոթ չէ դատարանի կողմից կայացրած որոշմանը.

«Ուշ ժամի ստացել ենք որոշումը, բավականին ծավալուն է, որովհետև ժամանակը չի ներել...»,-ասաց Փաստաբանը՝ լրագրողներին հորդորելով իրեն ու Քոչարյանի մյուս փաստաբանին՝ Արամ Օրբելյանին չտալ այնպիսի հարցեր, որոնց պատասխանելը կարող են խախտել քննության տվյալները չհրապարակելու մասին որոշումը: 

«Դա առաջացնում է քրեական պատասխանատվություն»,-ասաց փաստաբանը:

Արամ Օրբելյանն էլ իր հերթին նկատեց, որ Քոչարյանին կալանավորելու որոշումը բողոքարկելու են, քանի որ այն ապօրինի է:

Նրա կարծիքով զավեշտ է, որ մինչև վերջ չի կարողանում հասկանալ մեղադրանքը:

«Ինչ-որ փաստեր են նկարագրված, որից հետո ասված է 300.1 հոդված, ընդ որում, այն նույն հոդվածն է, որ կա Միքայել Հարությունյանի ու այլոց գործում: Մոտավորապես, այսպես է, ոնց որ ասեն Արամ Օրբելյանը արթնացավ, ցնցուղ ընդունեց, այսօր չսափրվեց, իջավ, նստեց ավտոմեքենան, ճանապարհին բենզին լցրեց, դրա համար ինքը մեղադրվում է գողության մեջ, որ պիտի կատարվի»,-ասաց նա:

Նրա խոսքով, ներկայացված ապացույցների մեջ Ռոբերտ Քոչարյանի մասով որևէ բան չկար: