Փաշինյան. Կառավարության տնտեսական քաղաքականության նպատակն առանց ցնցումների ներառող տնտեսական համակարգ ստեղծելն է

Նախատեսվածի համաձայն՝ այսօր՝ հուլիսի 20-ին, վարչապետ Նիկոլ Փաշինյանը հանդիպեց լրագրողներին։ Մինչ լրագրողներն իրենց հարցերը կուղղեին վարչապետին, նա հայտարարեց, որ ցանկանում է երկու կարևոր դիտարկում անել։

Նա նկատեց, որ շատերի համար դեռևս պարզ չէ, թե ի՞նչ տնտեսական քաղաքականություն է վարում կառավարությունը և այսօր կփորձի հստակեցնել։

«Ես կարծում եմ, որ ինչ-որ տեղ մեր մեղավորությունն է, որ մանրամասն չենք մեկնաբանել խնդիրը, թե ինչ տնտեսական քաղաքականություն է վարում կառավարությունը»,-ասաց Փաշինյանը՝ հավելելով, որ կառավարության տնտեսական քաղաքականության առանցքային նպատակը ներառող տնտեսական համակարգ ստեղծելն է:

Նրա խոսքով՝ հեղափոխությունից առաջ եղել է մի համակարգ, որտեղ տնտեսության որոշ ոլորտները ոչ բոլոր մարդկանց համար են հասանելի եղել, իսկ ներառող տնտեսական համակարգի իմաստն այն է, որ այդ սահմանափակումները չպետք է գոյություն ունենան, տնտեսական ոլորտները և ձևերը պետք է հասանելի լինեն բոլորին։

«Դա չի նշանակում, որ մարդիկ, ովքեր եկամուտներ ու շահույթներ են ունեցել այդ ոլորտում, այլևս չպետք է կարողանան շարունակել իրենց գործը, այլ նշանակում է, որ մյուսները ևս կարող են։ Ընդ որում՝ հաշվի առնելով, որ քաղաքական մակարդակում հարցը լուծված է իմ վարչապետ դառնալու առաջին օրից, կառավարությունն իրավիճակին ծանոթանալու համար, ժամանակ առ ժամանակ  մոնիտորինգ կանցկացնի, և կհասկանանք, թե ինչ փոփոխություներ են տեղի ունենում»,-ասաց Փաշինյանը՝ նկատելով, որ եթե այդ փոփոխությունները տեղի չեն ունենում կամ դանդաղում են՝  կառավարությունը պետք է մտածի նոր գործիքակազմեր կիրառելու մասին:

Ընդ որում՝ կառավարության նպատակն է այդ գործընթացն անել հանդարտ, առանց ցնցումների։ Փաշինյանը նկատեց նաև, որ իրենց տնտեսական քաղաքականության հիմնասյուներն են կոռուպցիայի դեմ պայքարը և անկախ դատական համակարգի ստեղծմանն ուղղված ջանքերը:

«Ներդրումային միջավայրի համար անհրաժեշտ է երկու պայման՝ անկախ դատական համակարգ և կոռուպցիայի բացակայություն: Մենք հետևողականորեն իրականացնում ենք այդ քաղաքականությունը, որը, բնականաբար, պետք է ամրապնդվի նոր օրենսդրական փոփոխություններով, այդ թվում՝ Հարկային օրենսգրքում, որով պետք է լուծվի փոքր ու միջին ձեռնարկություններին ուժ տալու, աջակցելու քաղաքական խնդիրը»,- ասաց Փաշինյանը։

Հաջորդ խնդիրը, որի մասին Նիկոլ Փաշինյանը բարձրաձայնեց, կադրային փոփոխություններն են։ Նրա խոսքով՝ նոր կառավարությունում գործում է 3 կադրային խումբ․ նոր և հին կադրեր ու նրանք, ովքեր լինելով հին ժամանակներում՝ այժմ փոխել են իրենց կարգավիճակը։

«Այս նոր իրավիճակում անխուսափելի է ադապտացիայի իրավիճակը։ Այս իրավիճակը նոր է բոլոր նշված խմբերի կադրերի համար։ Կառավարության վարած քաղաքականության ամենակարևոր խնդիրը՝ հեղափոխության անցնցում հաղթանակը ֆիքսելն է ու նաև ադապտացիայի շրջանը, որը բոլորին է վերաբերվում, ու դա լինելու է կադրային բոլոր խմբերում»։ 

Ըստ Փաշինյանի՝ այն, ինչ տեղի է ունեցել Հայաստանում, ուղղակի փոփոխություն չէ, դա ազգային ու պետական փոփոխություն է, որը շատերի համար անկանխատեսելի էր։

«Մեր հաջորդ նախագիծը, որը կցանկանայի արագ իրագործել, բայց որն արագ իրագործել չենք կարող՝ կադրային բանկի ձևավորումն է, որը հնարավորություն կբացի Հայաստանի ու սփյուռքի նոր կադրերի համար, որը կվերացնի կադրային հարցերի լուծման հետ կապված առկա խոչընդոտները»,-ասաց Փաշինյանը։