Դավիթ Անանյանը վախեցավ. նա չկարողացավ հարկ չվճարող «խոշորների» անուններ տալ

ՊԵԿ նախագահ Դավիթ Անանյանն օրերս խայտառակ մամուլի ասուլիսով հանդես եկավ: Իհարկե, ասուլիսի ընթացքում խելացի մտքեր շատ արտահայտեց, թվերով ցույց տվեց, թե ինքն ինչքան արդյունավետ է աշխատում, բայց մի տեղ վրիպեց, և այն էլ բավականին լուրջ խնդրի դեպքում:

Անանյանը մամուլի ասուլիսի ընթացքում ասաց, որ ավտոգազալցակայանների տերերից 8-ը հարկային պարտավորությունները չկատարելու հետևանքով պետությանը հասցրել են շուրջ 950 մլն դրամի չափով վնաս:

Այնուհետև անսալով լրագրողների բազմաթիվ հարց ու փորձին, թե ովքեր են այդ 8-ը, Անանյանը պոպուլիստական քայլ արեց հերթով թվելով անուններ՝ ՊԵԿ նախկին նախագահ Վարդան Հարությունյան, գործարար Մհեր Սեդրակյան (Թոխմախ Մհեր), Գագիկ Ծառուկյան: Անանյանն ընդգծեց նաև, որ Սեդրակյանին պատկանող գազալցակայանում չափագրումը կազմել է 15 մլն դրամ, որն, ի տարբերություն մյուսների, ամենաքիչն է:

Անանյանն այնուհետև խոստացավ, թե անուններ կտարածի լրատվական ծառայությունը, սակայն օրեր անց պարզաբանում եկավ լրատվամիջոցների էլեկտրոնային հասցեներին, որտեղ ոչ մի ավտոգազալցակայանի սեփականատիրոջ անուն նշված չէր: Նշվում էր միայն, որ այս կամ այն հայտնի անձնավորության հետ կապվող ընկերությունները շատ հաճախ փաստաթղթերով պատկանում են այլ ֆիզակական անձանց, և ընկերությունների փաստացի սեփականատերերի մասին տեղեկատվությունը կարող է հաստատվել քրեական գործի շրջանակներում ձեռք բերված ապացույցների հիման վրա:

Սեփական նախաձեռնության մեջ ՊԵԿ նախագահն իր հետքայլով փորձեց պաշտպանվել հետագա բոյկոտից, ինչպես դա եղավ սուպերմարկետների պարագայում: Բոլորս ենք հիշում` ինչպես սուպերմարկետների տնօրենները միասնական որոշում կայացրին և իրենց կամքը թելադրեցին կառավարությանը: Ավտոգազալցակայանների պարագայում նույն ճակատագիրն էր սպասվում, և տնտեսական այս երկու ոլորտում ցավոտ ձախողումները կարող էին հանգեցնել նոր իշխանությունների նկատմամբ վստահության կորստին, ինչից էլ Անանյանը խուսափեց և չցանկացավ խոշորների անուններ տալ:

Պետք է նկատել, որ պաշտպանական դիրքից հանդես եկող Անանյանի համար կրկնակի դժվար է այսուհետ որևէ մեծամասշտաբ ընկերություն մտնել, քանի որ «թույլ տեղերը բռնված են»:

Հիշեցում: «Ավտոստոպ», «ԳԱՕՄ Գրուպ», «Գազ Գրուպ», «Արզնի Գազ», «Ֆակել Գազ» և «Նախշին» ՍՊ ընկերություններում, ինչպես նաև «Գազպրոմ Արմենիա» ՓԲԸ-ին պատկանող «Ավտոգազ» ՍՊ ընկերությունում կատարված չափագրումների արդյունքում պարզվել է, որ այդ ընկերությունները 2016-2018 թվականների ընթացքում ցույց են տվել պակաս իրացված գազի ծավալներ, ինչի հետևանքով խուսափել են, համապատասխանաբար, 14,9 միլիոն, 168,4 միլիոն, 79,4 միլիոն , 53 միլիոն, 25,7 միլիոն, 349,5 միլիոն և 58,7 միլիոն ՀՀ դրամի չափով հարկ վճարելուց: