Դալանի տակ ընկած տղան ու մարտի 1-ի ամենաերիտասարդ զոհը․ Մարտի 1

NEWSPRESS.am-ն օրեր առաջ հրապարակեց նյութ այն մասին, թե Երևանի ո՞ր փողոցներում են սպանվել 2008 թվականի մարտի 1-ի զոհերը։ Այս ամենի հետ մեկտեղ կայքը շարունակում է փնտրտուքներն ու զրույցներն այն մարդկանց հետ, ովքեր անմիջապես մասնակցել կամ տեսել են 2008 թվականի մարտի 1-ի դեպքերը։

Թերթելով մարտի 1-ի դեպքերն ու իրադարձությունները՝ հստակ երևում է, որ բոլոր 10 զոհերի մահերն էլ առեղծվածային տարրեր ունեին։ Այս համատեքստում, սակայն, ամենատարօրինակն ու առեղծվածայինը մարտի 1-ի 2 ոստիկանների մահն էր։

Ոստիկանության զորքերի կապիտան Համլետ Թադևոսյանը մահացու վիրավորվել է Ռուսաստանի դեսպանատնից դեպի Մաշտոցի գետնանցում հատվածում։ Ըստ պաշտոնական տվյալների՝ Համլետ Թադևոսյանը զոհվել է ցուցարարի կողմից նետած պայթուցիկ սարքի պայթյունի հետևանքով։

Հաջորդ զոհը ոստիկանության զորքերի ժամկետային զինծառայող Տիգրան Աբգարյանն է։ Ըստ պաշտոնական տվյալների՝ ոստիկանության զորքերի ժամկետային զինծառայող Տիգրան Աբգարյանը 2008 թվականի մարտի 1-ին ՀՀ նախագահ Ռոբերտ Քոչարյանի կողմից արտակարգ դրության հայտարարումից 10 րոպե առաջ արդեն իսկ եղել է հիվանդանոցում։ Հրազենային ծանր վնասվածքով նա ապրել է 40 օր, որից հետո մահացել է հիվանդանոցում։ Զինծառայող Տիգրան Աբգարյանը մահացու վիրավորում է ստացել Լեոյի փողոցում, որտեղից նրան տեղափոխել են հիվանդանոց։

NEWSPRESS.am-ը զրուցեց Լեո-Պարոնյան խաչմերուկում ապրող բնակիչներից մեկի հետ, ով հասկանալի պատճառներով չցանկացավ ներկայանալ, սակայն պատմեց շատ հետաքրքիր փաստեր, որոնք նա տեսել է 2008 թվականի մարտի 1-ին։

«Այդ օրը տանից դուրս էինք եկել և վերադառնալիս չկարողացանք տուն գալ, քանի որ այս տարածքում ամբողջը ոստիկանական զորքեր էին։ Ոստիկանական ամբողջ զորքը փողոցում էր, ուժեղ կրակում էին։ Ես եկա ու չկարողացա տուն մտնել։ Մտա ընկերուհուս տուն, ապա շենքերի ու տների միջով մի կերպ հասա տուն։ Այդ կրակոցների ու բախումների ժամանակ մեր տուն նույնիսկ մի քանի բոմժեր էին մտել ու թաքնվել։ Մենք տանից դուրս էինք գալիս, մոտենում դալանին ու նայում, թե ինչ է կատարվում, ապա նորից փախնում ու գալիս տուն։ Հերթական անգամ դուրս գալիս տեսա, որ դալանի դիմաց ընկած է մի տղայի։ Փախա, մտա տուն, պատուհանը փակեցի, լույսերն անջատեցի, ու ընտանիքով թաքնվեցինք ինքներս մեր տանը։ Հետո չգիտեմ, թե այդ տղային ով տարավ, ինչպես տարան ու ուր տարան։ Նույնիսկ դեպքից մի քանի օր հետո դալանում՝ տղամարդու ընկած վայրում, արյուն էր։ Մեր տուն նույնիսկ մի քանի հոգի ոստիկաններ են եկել ու թաքնվել կրակոցների ժամանակ»։

Թերթելով Տիգրան Աբգարյանի մասին հարցաքննություններն ու տեսանյութերը՝ պարզ է դառնում, որ նրա վրա կրակել են դալանից։ Տիգրանից զատ, Լեո-Պարոնյան խաչմերուկի մոտ զոհվել է Դավիթ Պետրոսյանը, ով զոհվել է Պարոնյան փողոցի կրպակների դիմաց «Մակարով» տեսակի ատրճանակի կրակոցից։ Այդ տարածքին մոտ է զոհվել նաև Գրիգոր Գևորգյանը։ Նա զոհվել է Լեո-Պարոնյան խաչմերուկում դիպուկահարի կրակոցից։

Տեսախցիկը նկարահանել է այդ պահը և տեսանելի է, որ դիպուկահարի կողմից խոցված մարդն ընկած է այլ տարածքում։ Թերթելով նաև այն մարդկանց հարցաքննությունները, ովքեր տեսել են Տիգրան Աբգարյանին, փաստում են, որ նրա վրա կրակել են այն ժամանակ, երբ Տիգրանը դալանին մոտ է եղել։ Տրամաբանորեն NEWSPRESS.am-ի հետ զրույցում կնոջ մատնանշած տղան եղել է Տիգրան Աբգարյանը, ով մահացու վիրավորում է ստացել դալանում։

Ընդգծենք նաև, որ ոստիկանության զինծառայող Տիգրան Աբգարյանի մահը մինչ օրս առեղծված է։ Տիգրանը մարտի 1-ի ամենաերիտասարդ զոհն էր։

Լուսանկարում պատկերված է կնոջ մատնանշած դալանը