Թռիչքաձև վերելք. Գագիկ Ծառուկյանը հայ-սինգապուրյան բարեկամության հիմք է դնում

Հայաստանի տնտեսությունը լրջագույն փոփոխությունների կարիք ունի, բացի այդ, մեր երկրին պետք են ներդրումներ, աջակիցներ, ինչու չէ, նաև պարզապես ճիշտ խորհուրդներ:

Այս ամենին հասնելու համար առաջնային պայմանը շփումն է այլ՝ առավել զարգացած երկրների ներկայացուցիչների, բիզնես խորհրդատուների և հատկապես բիզնեսմենների հետ: Այս կարևոր գործում դեռևս Հայաստանում ոչ մի կառավարություն չի հաջողել, այդ է պատճառը, որ ժամանակն է հասկանալու, որ պետք է սլաքներն ուղղել ոչ միայն պետության ներուժի վրա, այլ գործարարների ուղղությամբ:

Հայաստանում նման մի հանդիպում օրերս կայացավ «Բարգավաճ Հայաստան» կուսակցության նախագահ Գագիկ Ծառուկյանի նախաձեռնությամբ: Սինգապուրից Հայաստան են ժամանել պառլամենտի պատգամավորներ, գիտնականներ, իրավական-ֆինանսական հարցերի փորձագետներ:

Կարելի է ասել, որ Հայաստանի համար թռիչքային զարգացման սինգապուրյան հրաշքը միշտ էլ նախանձելի է եղել, նախկին իշխանությունների ժամանակ Կարեն Կարապետյանը բազմիցս էր ասում, որ Հայաստանը պետք է տանել Սինգապուրի ուղով, ինչը դժվար է, բայց ցանկության և նպատակադրվածության պարագայում՝ իրագործելի:

Ինչպես երևում է Գագիկ Ծառուկյանի քայլերից, այդ ուղղությամբ է արդեն շարժվում գործարար քաղաքական գործիչը, ով Հայաստանում կազմակերպել էր «Արդյունավետ կառավարում և առաջնորդություն, Սինգապուրի փորձը» խորագրով կոնֆերանսը: Նա այդ կերպ փորձում է ռեալ հիմքի վրա դնել հայ-սինգապուրյան բարեկամությունը, փորձի փոխանակումը:

Իր միջոցների հաշվին պետության վարկանիշը բարձրացնող նման հանդիպումները խոսում են հայրենասիրության և ժողովրդի համար դրական քայլեր անելու մեծ պատրաստակամության մասին: Բոլորս ենք հասկանում, որ նման հանդիպումները լավ հնարավորություն են միջազգային ասպարեզում Հայաստանի ներդրումային շուկայի մասին դրական ազդակներ հղելու և ակնկալելու համար, որ ներդրումներ կբերվեն և կաշխուժացնեն մեր երկրի տնտեսությունը: