«Կարևորագույն հարցերում հին իշխանությունները պահպանում են իրենց դիրքերը»

Տիգրան Խզմալյանը չգիտի, թե քաղաքական ինտրիգներն ինչով կավարտվեն, համենայդեպս այս պահին այդ մասին դժվարանում է ասել, բայց վստահ է, որ եթե «Երկիր Ծիրանի» կուսակցության ղեկավար Զարուհի Փոստանջյանը  ընտրվի Երևանի քաղաքապետ, հեղափոխությունը կհաղթի:

«Նախախորհրդարան» և «Միացում» շարժումների նախկին անդամ Խզմալյանը NEWSPRESS.am-ի հետ զրույցում նկատեց նաև, որ հակառակ պարագայում կնշանակի, որ հեղափոխությունը Երևանում նույնիսկ չի սկսվել:

Նկատենք, որ Խզմալյանը, Զարուհի Փոստանջյանի համախոհների հետ մասնակցում էր քաղաքապետարանի դիմաց կազմակերպված ակցիային, որի ակտիվիստները ավագանու անդամներին կոչ էին անում քվեարկել Փոստանջյանի օգտին: 

Չնայած դրան՝ նիստը չկայացավ՝ քվորում չլինելու պատճառով: Նիստին մասնակցել են միայն «Երկիր Ծիրանի» խմբակցության 3 անդամ, ևս մեկ ավագանու անկախ անդամ և նիստը վարող փոխքաղաքապետ Կամո Արեյանը:

Տիգրան Խզմալյանը մեզ հետ զրույցում նկատեց, որ նման կերպ հեղափոխություն չի լինում:

«Հարց է առաջանում. մենք ուզում են միայն դեկո՞րը փոխել, թե՞ լուրջ հեղափոխություն ենք ակնկալում: Իշխանության դեմքը չի փոխվել՝ չհաշված մի քանի խամաճիկների»,-ասաց Խզմալյանը՝ ընդգծելով, որ Զարուհի Փոստանջյանն այդ խամաճիկներից չէ:

Նրա խոսքով՝ քաղաքապետարանն այդ խամաճիկների տիրույթում է և այն, որ այսօր քաղաքապետ չընտրվեց, նշանակում է, որ կարևորագույն հարցերում հին իշխանությունները պահպանում են իրենց դիրքերը և նոր իշխանություն այդպես էլ չի ձևավորվի:

«Եթե սա հեղափոխություն է, ապա իսկապես արժեքային համակարգի փոփոխություն պետք է լինի, իսկ դա առայժմ տեղի չի ունենում»,- ասում է մեր զրուցակիցը:

Նրա գնահատմամբ՝ «կանսերվայի բանկաների» հետևից ընկնելը դեռևս իրական խնդիրներ չեն: Խզմալյանն ակնկալում է ավելի լուրջ քայլեր, քանի որ «կանսերվայի բանկաները» ո՛չ թե մեր  երկրում տեղի ունեցող թալանի ու կոռուպցիայի պատճառն է, այլ հետևանքը: