Եթե «Ոսկե գնդակ», ապա միայն Լուկա Մոդրիչ․ մի համեստ տղայի մասին

Երևի աշխարհում ոչ ոք չէր հավատում ու մտածում, որ Խորվաթիայի նման համեստ հավաքականը կարող է հայտնվել Աշխարհի այս առաջնության եզրափակչում։ Միգուցե խորվաթները նույնպես չէին հավատում, սակայն այս տղաները կարողացան իրենց կամային հատկանիշների շնորհիվ անել անհնարինը։ Իսկ թիմի շարժիչը, ուղեղն ու հոգին Լուկա Մոդրիչն է։ Ֆուտբոլում ընդունված է, որ կիսապաշտպանները, ովքեր կառուցում են խաղը, համարվում են ամենախելացի ու ինտելեկտուալ ֆուտբոլիստները։

Երբ իտալական «Միլան»-ը ժամանակին վաճառեց Անդրեա Պիրլոյին՝ պատճառաբանելով, որ նա ծեր է ու ակումբին պետք չէ, բոլորը մտածում էին, որ դա այդպես է, սակայն այս խելացի տղան եկավ «Յուվենտուս» ու արեց անհավատալին։ Մոդրիչը 33 տարեկան է։ Այս տղան Մադրիդի «Ռեալ»-ի խելքն է։ Նա կազմակերպում է խաղը, գրոհները, նա կարողանում է անելանելի իրավիճակներում գտնել ելք։ Մեծ հաշվով այս տղան չի երևում խաղադաշտում, սակայն բավական է տեսնել Մոդրիչի խաղը, ամբողջ 90 րոպե հետևել նրա գործողություններին, ու պարզ կդառնա, որ այս տղան չի սխալվում ու խաղադաշտում ամենախելացին է։

Մինչ Աշխարհի առաջնության սկսվելը, բոլորը «Ոսկե գնդակը» կապում էին Սալլահի ու Ռոնալդուի հետ։ Եգիպտոսն ու Պորտուգալիան սայթաքեցին, ու բարձունքում հայտնվեց ֆուտբոլային PR-ի թիվ 1 առաջատարը՝ Նեյմարը, սակայն այս տղան նույնպես տապալվեց։ Իսկ երեկ, երբ Խորվաթիայի հավաքականը կարողացավ հաղթել Անգլիային, բեմում հայտնվեց այս համեստ, փոքրամարմին ու խելացի տղան, ով արդեն 10 տարուց ավելի իր համեստությամբ չի երևում անհամեստ տղաների կողքին։ Բոլոր սպորտային պարբերականները սկսեցին գրել, որ անկախ Ֆրանսիա-Խորվաթիա հանդիպումից, Մոդրիչը պիտի ստանա «Ոսկե գնդակը»։

Ժամանակին ֆուտբոլն ուրիշ էր ու շատ գոլեր խփելը չափանիշ չէր, որ գոլերի համար ֆուտբոլիստը ստանա «Ոսկե գնդակ»։ Իսկ հիմա իրական պահն է, որ այս համեստ տղան ստանա «Ոսկե գնդակ», ով մի հզոր ակումբի՝ Մադրիդի «Ռեալ»-ի ուղեղն է, ով Մադրիդի «Ռեալ»-ի անփոխարինելի կիսապաշտպանն է։ Այս տղան է կարգավորում թիմի խաղը, որոշում, թե ինչպես պիտի խաղան։ Այս համեստ տղան իր հետ տանում է Խորվաթիայի հավաքականը։

Եթե «Ոսկե գնդակ», ապա միայն Լուկա Մոդրիչ։