Մադրիդի «Ռեալ»-ում սիրում են հեշտ ու հանգիստ ակումբի դռնից դուրս շպրտել լեգենդներին

2010 թվական։ «Ռեալ»-ի մարզիչ նշանակվեց Ժոզե Մոուրինյուն։ Վերջինս տեսնում էր Ռաուլին երրորդ կամ չորրորդ հարձակվողի դերում։ «Ռեալ»-ի լեգենդը որոշեց հեռանալ։

2015 թվականի հուլիսի 11-ին «Ռեալ»-ի պաշտոնական կայքը հայտարարեց, որ «արքայական ակումբը» և «Պորտու»-ն համաձայնության են եկել։ Կասիլյասը դարձավ պորտուգալական թիմի անդամ՝ տեղափոխվելով ազատ գործակալի կարգավիճակով։

2018 թվականի հուլիսի 10։ Կրիշտիանու Ռոնալդուն դարձավ իտալական «Յուվենտուս»-ի ֆուտբոլիստ։

Սրանք վերջին 20 տարիների Մադրիդի «Ռեալ»-ի այն առաջատարներն են, ովքեր լքեցին ակումբը։ Միգուցե շատերի համար անհասկանալի է, բայց Մադրիդում սիրում են հեշտ ու հանգիստ դռան կողմը ցույց տալ իրենց լեգենդներին։ Հավանաբար, 21-րդ դարում այդպես է։ Այն, ինչ ակումբի համար արել են այս 3 տղաները, կարծում եմ՝ շատ քչերին է հաջողվել։ Այս 3 տղաներն իրենց տեղն ունեն, սակայն Ռոնալդուն մի ամբողջ պատմություն է։ Միայն վերջին 3 տարիներին այս տղան իր հետ միասին ամբողջ թիմին տարավ Չեմպիոնների լիգայի եզրափակիչ, որոնցում էլ հաղթեց։ Մադրիդի «Ռեալ»-ի նախագահ Ֆլորենտինո Պերեսը նույնիսկ արգելեց թիմի կիսապաշտպան Կրիշտիանու Ռոնալդուի համար հրաժեշտի արարողություն կազմակերպել: Մամուլն էլ իր հերթին գրեց, որ այդկերպ ակումբի նախագահը պատժում է մեծ պորտուգալացուն։ Փաստացի, «Ռեալ»-ում սիրում են հեշտ ու հանգիստ հրաժեշտ տալ լեգենդներին, նրանց չոր ու ցամաք շնորհակալություն հայտնել և իրենց պատմության մեջ ամրագրել այն տիտղոսները, որոնք ակումբին բերեցին դռնից դուրս գտնվող տղաները։

Ապագայում կբացվի այս խառնաշփոթ կծիկը, ու 2 կողմերը կխոսեն, որից էլ պարզ կդառնա, թե իրականում ինչ կար թաքնված այս ամենի հետևում։

Իսկ փոխարենը՝ կան ակումբներ ու նախագահներ, ովքեր մինչև վերջին վայրկյանը գնահատում են իրենց լեգենդներին։ Պաոլո Մալդինի, Ֆրանչեսկո Տոտտի, Ջանլուիջջի Բուֆֆոն։ Ռոնալդուն ընտրել է հարգանքի երկիրը՝ Իտալիան։ Անկախ ամեն ինչից, թե Ռոնալդուն իրեն ինչպես կդրսևորի թուրինյան ակումբում, այնուամենայնիվ, այդ ակումբում գիտեն հարգել, գնահատել ու արժանին մատուցել լեգենդներին։

Ռոնալդուն հասկացավ, որ թուրինյան ծափերն իր համար են, ու նա որոշեց Պերեսի արհամարհանքը փակել թուրինի հարգանքի ծափերով։