Մայրության նպաստ կստանա 44 հազար կին

2016թ. Հայաստանում մայրության նպաստ կստանա 44 հազար կին:

Այս մասին նոյեմբերի 18-ին խորհրդարանում Հայաստանի 2016թ. պետբյուջեի քննարկման ժամանակ հայտնել է Աշխատանքի ու սոցիալական հարցերի նախարար Արտյոմ Ասատրյանը: Նպաստի միջին չափը կկազմի մոտավորապես 210 հազար դրամ (ընթացիկ փոխարժեքով մոտավորապես 440 դոլար): Այդ նպատակների համար կհատկացվի 9.3 մլրդ դրամ:

Ընդհանուր առմամբ 2016 թ բյուջեից ծրագրված է վճարել 82 մլրդ դրամի նպաստ (ընթացիկ փոխարժեքով շուրջ 170 մլն դոլար), ինչը կկազմի բոլոր սոցիալական ծախսերի 22.5 տոկոսը:

Այդ թվում, անապահովության նպաստ է վճարվելու 105 հազար ընտանիքների ՝ 400 հազար մարդ ընդհանուր թվաքանակով: Այս նպատակների համար կհատկացվի 38.3 մլրդ դրամ: Մեկ ընտանիքին ամսական բաժին է հասնելու մոտավորապես 30 հազար դրամ ( 60 դոլար):

Երեխային դաստիարակելու նպատակով աշխատանքից ժամանակավորապես հեռանալու նպաստը կկազմի ամսական 18 հազար դրամ:2016թ. այդ նպաստը կստանան 13 հազար մայրեր, իսկ նպաստների ընդհանուր գումարը կկազմի 2.8 մլրդ դրամ: Ժամանակավոր անաշխատունակության նպաստը 2016 թ. կստանա մոտավորապես 10 հազար մարդ ՝ տարեկան 260 հազար դրամի (540 դոլարի) չափով: Ընդհանուր առմամբ այս ծրագրին կհատկացվի 2.6 մլրդ դրամ:

Ծերության, հաշմանդամության ու կերակրողին կորցնելու նպաստներ կստանա շուրջ 66 հազար մարդ, յուրաքանչյուրին բաժին կհասնի մոտավորապես 210 հազար դրամ (440 դոլար): Ընդհանուր առմամբ այս ծրագրի համար կհատկացվի շուրջ 14 մլրդ դրամ:

Մահվան ու թոշակառուի հուղարկավորության նպաստը 2016 թ. կկազմի միջինը 200 հազար դրամ (415 դոլար): Ընդհանուր առմամբ այս նպատակներով կհատկացվի 5 մլրդ դրամ: