Մակունցը խոսում է ու «կոտրում կարծրատիպեր», իսկ երիտասարդները լռում են ու կատարում աշխատանք․ Օպերայի խայտառակությունը վերանում է (լուսանկարներ)

NEWSPRESS.am-ը մի քանի անգամ անդրադարձել է Օպերայի տարածքում տիրող խայտառակությանը։ Այդ տարածքում այդպես էր իշխանափոխությունից առաջ, այդպես է նաև հիմա։ Ոչինչ չի փոխվել։ Հատկանշական է, որ համացանցում նույնպես մի շարք անհատներ բարձրաձայնում են, որ Մշակույթի նորանշանակ նախարարը պետք է այս հարցին լուծում տա։ Նախարարությունն այդ հարցի հետ կապված դեռ ոչինչ չի արել, իսկ փոխարենը մի քանի երիտասարդներ համախմբվեցին ու շաբաթ առավոտյան Օպերայի բակում գտնվող Հովհաննես Թումանյանի արձանը մաքրեցին։

NEWSPRESS.am-ը զրուցեց համակարգչային գրաֆիկ, նկարիչ Ասյա Մինասյանի հետ, ով համախմբեց մի քանի մարդկանց ու միասին իրականացրեցին մի աշխատանք, որը պիտի իրականացներ Մշակույթի նախարարության հուշարձանների պահպանության բաժինը։

«Ուրբաթ երեկոյան, սովորության համաձայն, Ֆեյսբուք սոցիալական ցանցում էի ու կարդացի ընկերներիցս մեկի գրառումն այն մասին, որ Օպերայում մի իսկական խայտառակություն է տիրում։ Եթե անկեղծ լինեմ, ապա Օպերայում շատ քիչ եմ լինում։ Որոշեցի իմ ֆեյսբուքյան բոլոր ընկերներին հերթով նամակ գրել ու հասկանալ, թե ով կգա օգնելու, որ Հովհաննես Թումանյանի արձանի վրայի «աղբանոցը» մաքրենք։ Սա իմ քաղաքն է ու ես պիտի մաքրեմ։ Եթե քաղաքի կենտրոնում այս վիճակն է, ապա պատկերացնում եմ, թե Հայաստանի ծայրամասերում ու մյուս տեղերում ինչ վիճակ է տիրում։ Հավաքվեցինք 3 հոգի, մեր գումարով գնեցինք սպունգներ, մարկեր մաքրող հատուկ հեղուկ ու դույլեր։ Առավոտյան ժամը 06։00-ին հավաքվեցինք Թումանյանի արձանի մոտ ու սկսեցինք մաքրել այն»։

Ասյա Մինասյանն ընդգծեց, որ չէր պատկերացնում, որ այսպիսի խայտառակ վիճակ է․ ծամոններ, ինստագրամյան էջերի խզբզոցներ, հայհոյանքներ, գրառումներ, փակցված թղթեր։ Նա խոսեց նաև, թե առաջիկայում ինչ են ցանկանում անել։

«Աշխատեցինք մոտ 4 ժամ, մաքրեցինք արձանի պատվանդանի մեծ մասը, սակայն դեռ շատ բան մնացել է։ Առաջիկայում ցանկանում ենք ֆեյսբուքյան իվենթ բացել, որպեսզի շարունակենք մաքրել ինչպես Թումանյանի արձանի մի մասը, այնպես էլ Ալեքսանդր Սպենդիարյանի արձանն ամբողջությամբ, քանի որ այնտեղ ավելի խայտառակ վիճակ է։ Ես հասկանում եմ, որ 2 ամիս է, ինչ իր պաշտոնոմ նստած է Մշակույթի նախարարը ու շատ բան պահանջել պետք չէ, սակայն սա այն բանն է, որ պիտի արվի։ Դա նման է այն իրավիճակին, որ ես խոհարար եմ մի ռեստորանում ու ասում եմ, որ ուտելու ոչինչ չեմ պատրաստելու։

Մշակույթի նախարարությունում կա համապատասխան բաժին, որտեղ պետք է զբաղվեն այս հարցով։ Միգուցե նրանք ինչ-որ բան անում են, սակայն տեսանելի ոչինչ չկա արված, ուր մնաց, թե խոսենք մեր հանրապետության ծայրամասերում գտնվող հուշարձանների պահպանության մասին։ Իրենց կողմից կա անգործություն, իսկ մեր կողմից՝ փնթիություն»։

Ասյան հավելեց նաև, որ կա նաև դաստիարակության խնդիր, ու ծնողներն իրենց երեխաներին պիտի դեռ մանկուց սովորեցնեն, որ նմանատիպ բաներ չի կարելի անել։ Նա ընդգծեց նաև, որ առաջիկայում պատրաստվում է դիմում-խնդրանքով դիմել Մշակույթի նախարարությանը, որ նրանք առավել մեծ ուշադրություն դարձնեն Օպերային, ինչպես նաև մյուս հուշարձաններին։