«Կներեք մեզ»․ Քարանձավում փակված երեխաների հուզիչ նամակն իրենց ծնողներին

Թայլանդի քարանձավներից մեկում արգելափակված 12 դպրոցականներն ու իրենց մարզիչը նամակ են գրել իրենց հարազատներին։ Այս մասին հաղորդում է Ntv.ru-ն։

Փրկարարական նավատորմի լողորդներն ուղարկված նամակն ու լուսանկարը տեղադրել են իրենց ֆեյսբուքյան էջում։ Երիտասարդ ֆուտբոլիստների ծնողներն ու հարազատներն արդեն 2 շաբաթ է, ինչ ապրում են քարայրի տարածքում։ Տղաները 11-16 տարեկան են։ Տղաներն իրենց մայրիկներին ու հայրիկներին հորդորել են, որ շատ չանհանգստանան։
«Երբ ազատվենք արգելափակումից, ցանկանում ենք ուտել համեղ սնունդ։ Սիրելի ուսուցիչներ, մեզ տնային առաջադրանքներ շատ մի տվեք»,- նշել են տղաներն ու նամակի վերջում յուրաքանչյուրն իր ձեռագրով գրել, թե ինչպես է իրեն զգում։

Գրառում է կատարել նաև ֆուտբոլային թիմի մարզիչը, ով արդեն հիմա ամենաքննադատվողն է։ Շատերը նշում են, որ նա չի հետևել անվտանգության կանոններին ու իր հետ մեկտեղ մեկ տասնյակ երեխաների կյանքը կործանման է տարել։

Իսկ մյուս մասը նշում է, որ նրա շնորհիվ տղաները կենդանի են մնացել մինչև հիմա։

«Շնորհակալություն, որ աջակցում եք մեզ։ Ես խնդրում եմ, որ ինձ ներեն երեխաների ծնողները։ Խնդրում եմ նաև, որ ծնողները ներեն ու չբարկանան իրենց երեխաների վրա այն բանի համար, որ առանց իրենց տեղյակ պահելու երեխաները եկել են քարանձավ»,- իր խոսքում նշել է մարզիչը։

Նշենք, որ Թայլանդի երիտասարդական ֆուտբոլային թիմի տղաներն ու իրենց մարզիչը կորել էին հունիսի 23-ին։ Նրանք մտել էին 7 կիլոմետր երկարությամբ Թամ Լուանգ քարանձավն ու անձրևաջրերի ու փլուզման պատճառով մնացել ներսում։ 10 օր տևած փրկարարական աշխատանքներից հետո երեխաներն ու իրենց մարզիչը հայտնաբերվել են։ Նրանք ողջ են, սակայն սովից հյուծվել ու թուլացել են։ Հավելենք նաև, որ փրկարարական աշխատանքների ժամանակ թթվածնային բալոն հասցնելիս մեկ փրկարար մահացել է։