ԱԱԾ պետը՝ Միքայել Հարությունյանի, Տարոն Մարգարյանի և Վլադիմիր Գասպարյանի մասին

Միքայել Հարությունյանը երկրից դուրս է եկել այն ժամանակ, երբ նրա նկատմամբ դեռևս հետախուզում հայտարարված չէր: Ազգային անվտանգության ծառայությունը լիարժեք տիրապետում է իրավիճակին: Այդ մասին այսօր լրագրողների հետ զրույցում ասաց ԱԱԾ պետ Արթուր Վանեցյանը: 

Ինչ վերաբերում է Երևանի քաղաքապետ Տարոն Մարգարյանին, ապա ԱԱԾ պետն ասաց, որ քննություն է ընթանում և արդյունքների մասին հանրությունը կտեղեկանա լրացուցիչ: Նա հերքեց տեղեկությունն այն մասին, որ խուզարկվել է Տարոն Մարգարյանի տունը. «Չկա նմնա բան»,- ասաց Վանեցյանը՝ հավելելով, որ «Երևան» հիմնադրամի հետ կապված քննության ընթացքում այդ երևույթներն էլ են ուսումնասիրում՝ կապված Մարգարյանի ունեցվածքի մասին հրապարակված տեսանյութի հետ. «Եթե կլինեն խախտումներ, գնահատական կտրվի»:

Հարցին, թե Տարոն Մարգարյանը հրավիրվե՞լ է հարցաքննության, Վանեցյանն ասաց, որ դեռևս ոչ: Ինչ վերաբերում է քաղաքապետի գտնվելու վայրին, ապա, ԱԱԾ պետի խոսքով, Տարոն Մարգարյանը միանշանակ Հայաստանի Հանրապետությունում է:

Արթուր Վանեցյանը չմեկնաբանեց մամուլում հրապարակված տեղեկությունն այն մասին, ըստ որի՝ նախկին ոստիկանապաետ Վլադիմիր Գասպարյանը մոտ երկու ժամ եղել է ԱԱԾ-ում. «Հետո կհրապարակենք, եթե ինչ-որ բան լինի»: