«Երկաթի տռուբեքով, «ակուռատնի» իրանց գործողությունն անցկացնում են». Հովտաշատի գյուղապետը սատարում է օրինախախտների՞ն (տեսանյութ)

Մասիսի շրջանի Հովտաշատ գյուղի բնակչուհի տիկին Սուսաննան ու նրա ընտանիքն ահազանգում են՝ հանդիպակաց տան հարևանը՝ Դավիթ Մանուկյանն ու նրա որդին՝ Արմենը, փորձում են իրենց «օրենքները» թելադրել:

Երկու հարևանների կռիվը նոր չի հասունացել: Տիկին Սուսաննան և նրա որդին NEWSPRESS.am-ի հետ զրույցում պատմում են, որ դեռ այս երկու ընտանիքների մեծերի ջրերը, ինչպես ասում են, նույն առվով չեն հոսել: Այս անհաշտությունը հայրերը «ժառանգություն են թողել» իրենց որդիներին: Տիկին Սուսաննան 26 տարի առաջ է հարսնացել այս ընտանիքում, փորձել է հարթել այս անջրպետը, սակայն փորձը ցույց է տվել, որ իր բարությունն ու մարդկային վերաբերմունքն օգտագործվել է հարևանների կողմից հենց իր դեմ:

Այսօր նրանց միջև նորից խնդիրներ են ծագել: Դավիթ Մանուկյանը որոշել է ջրագիծ անցկացնել հենց այս ընտանիքին պատկանող պատի կողքով, որի հետևանքով վնասվել է նրանց պարիսպն ու գարշահոտություն է տարածվել այդ տարածքում: Տիկին Սուսաննան և նրա ամուսինը վստահեցնում են, որ դա Մանուկյանների կոյուղագիծն է, հակառակ դեպքում՝ ջուրն այդչափ կեղտոտ ու գարշահոտ չէր լինի:

Գյուղապետ Հովհաննես Թադևոսյաննն էլ պնդում է, թե դա ոչ թե կոյուղագիծ է, այլ ջրահեռացման համակարգ: Միաժամանակ գյուղապետը նշում է, որ ջրահեռացման համակարգի խնդիրը գյուղում ավելի քան 50 տարի առկա է, սակայն չեն լուծել այն, քանի որ բյուջե չեն ունեցել: Ու հիմա պետք է մի բան էլ շնորհակալություն հայտնել Մանուկյաններին՝ այս աշխատանքի համար:

«Ջրահեռացման համակարգ ա, էս մարդիկ հարևանի վնաս չտալու համար՝ երկաթի տռուբեքով, սիրուն, «ակուռատնի» իրանց գործողությունն անցկացնում են... իսկ եթե իրանք դեմ են (նկատի ունի տիկ. Սուսաննայի ընտանիքին-հեղ.) ուրեմն ես թաղային կտանեմ, որ վիճաբանություն չլինի, ու անցկացնեն»,- NEWSPRESS.am-ի հետ զրույցում ասաց գյուղապետը՝ հավելելով, որ այդ մարդկանց բացատրել են, որ ջրահեռացման համակարգ է, բայց նրանք չեն հասկանում: 

Հովհաննես Թադևոսյանը, չգիտես ինչու, նույն կերպ գնահատականներ չհնչեցրեց նաև Մանուկյանների ընտանիքի մասին և ավելի մեղմ որոկումներ տվեց:

Մասնավորապես՝ դիտարկմանը, որ Մանուկյանները փակել են նաև այս ընտանիքի խմելու ջրի փականը, գյուղապետը նշեց, որ գիտի այդ մասին և զգուշացրել է Մանուկյաններին. «Ասել եմ, որ նման բան չանեն, էլ չեն անում, մարդիկ հասկացել են»,-ասաց գյուղապետը: Սա այն դեպքում, երբ տիկին Սուսաննան վստահեցնում է, որ իրենց խմելու ջուրը հաճախ են փակում:

Այլ կերպ ասած՝ Հովհաննես Թադևոսյանը մեզ հետ զրույցում անընդհատ պաշտպանում ու արդարացնում էր Մանուկյաններին: Մեր հարցին, թե որևէ ազգակցական կամ գուցե կուսակցական-գործընկերային կապ կա՞ իրենց միջև, Հովհաննես Թադևոսյանը արձագանքեց. «Ինչի՞ց վերցրեցիք... (ծիծաղեց). էս ի՞նչ լրագրողական հարցեր եք տալիս, բացարձակ ոչ մի կապ չկա, նույնիսկ չեմ կարող ասել, որ մեկը ընտրել ա, մյուսը՝ չէ: Չէ, կապ չկա»,- ասաց նա և հավելեց. «Ով ասես ինձ չի զանգահարել, իրենք բոլորին դիմել են. է՛լ իր ընկերներից, է՛լ մարզպետարանից... հիմա էլ լրագրողներ (դարձյալ ծիծաղում է)... չէ, կապ չկա մեր մեջ՝ ոչ մի ձև...»,- կարծես ինքն իրեն փորձում էր համոզել գյուղապետը:

Հ.Գ. Մեր տեղեկություններով, շինաշխատանքներ իրականացնելու համար Դավիթ Մանուկյանը զարտուղի ճանապարհներով ձեռք է բերել փաստաթղթեր. ասում են՝ թույլտվություն ունի նույնիսկ հակահամաճարակային կենտրոնից, այն դեպքում, երբ խողովակներով անցնում է կեղտաջուր: Կան նաև տեղեկություններ, որ  նա գումարով է ձեռք բերել այդ փաստաթղթերը: Իսկ թե ինչու է այս պատմության մեջ գյուղապետն այսքան շահագրգռված է և ինչ ակնկալիքներ ունի, թերևս դեռ կբացահայտվի: