Անպատվաբեր հեռացում. Հայրապետյանին սպասվող ճակատագիրը

NEWSPRESS.am-ը հետևողական է ՀՖՖ-ում տեղի ունեցող անօրինական գործընթացներին:

Տարիներ շարունակ ՀՖՖ նախագահությունը վայելող Ռուբեն Հայրապետյանը պատրաստվում է կեղծիքների մեթոդով կրկին վերընտրվել այդ պաշտոնում և այդպիսով ղեկավար լինելու իր անհագ տենչը բավարարել:

Կեղծիքներով հագեցած ժողով տեղի ունեցավ հունիսի 30-ին Սևանի` իրեն պատկանող «Հարսնաքար» հյուրանոցային համալիրում: Ռուբեն Հայրապետյանը պարզապես 8 ֆուտբոլային ակումբ հեռացրեց ՀՖՖ անդամությունից, քանի որ այս ակումբները չէին պատրաստվում իրեն ընտրել որպես ՀՖՖ նախագահ: Բացի դրանից, նույն ժողովի ընթացքում Ռուբեն Հայրապետյանը 12 նոր կազմակերպության անդամակցություն հաստատեց։ Թե ինչ մեթոդով, դրա վերաբերյալ դեռևս ՀՖՖ-ն չի կարողանում պաշտոնական տեսանյութ հրապարակել և փաստերով ցույց տալ:

Ըստ ամենայնի, այս նոր կազմակերպությունները նախապես մշակած պլանով կընտրեն Հայրապետյանին` նախագահի պաշտոնում: Այս պլանի դեպքում թերևս նախանձով և ափսոսանքով կշարունակենք հետևել այլ երկրների ֆուտբոլային թիմերի մրցապայքարներին և կշարունակենք դոփել նույն տեղում և, այսպես ասած, ֆուտբոլային ուժեղ թիմ ունենալու էջը կհամարենք փակված:

Ժողովից հետո իր ճեպազրույցում Հայրապետյանին հարցրել էին հնարավո՞ր է նորից պայքարի պատգամավորական մանդատի համար, վերջինս ասել էր, թե դա իր կյանքի ամենամեծ սխալն է եղել և այն այլևս չի պատրաստվում անել: Հայրապետյանին թերևս պետք է հուշել, որ կեղծելով ՀՖՖ նախագահի այս ընտրությունները՝ իր կյանքում ևս մեկ սխալ թույլ կտա և այս նոր իրողությունների պարագայում, հասարակության այս նոր ընկալումների շրջանում Հայրապետյանին ոչինչ չի մնա, քան անպատիվ հեռանալն իշխանությունից: Կյանքի նոր օրենք է դարձել Հայաստանում` իշխանությունից չես գնում` հեռացնում են, ավելին՝ ստիպողաբար և անպատիվ ձևով են հեռացնում:

Ի՞նչ կլինի Հայրապետյանի հետ, երբ ֆուտբոլասեր տաքարյուն երիտասարդները որոշեն հավաքվել Ավանում: