Լֆիկը, Տարոն Մարգարյանը, Հրայր Թովմասյանը և այլք կրկին ՀՖՖ նախագահ կընտրեն Նեմեց Ռուբոյին

Շուտով ՀՖՖ-ի նախագահի ընտրություններն են, ասել է թե` միակ թեկնածու Ռուբեն Հայրապետյանի ̀ Նեմեց Ռուբոյի ընտրության հարցն է դրվում:

Ի դեպ, ըստ ՀՖՖ կանոնադրության, նախագահն ընտրվում է գործադիր կոմիտեի անդամների պատվիրակների կողմից:

Իսկ ովքե՞ր են գործադիր մարմնի անդամները. նրանցից մի մասը հանրության մեջ բավականին հայտնի մարդիկ են: Օրինակ՝ Սամվել Ալեքսանյան, Տարոն Մարգարյան, Վիկտոր Դալլաքյան, Հրայր Թովմասյան, Սուքիաս Ավետիսյան, Լևոն Հասրաթյան և այլք, մյուսներն էլ հիմնականում ՀՖՖ աշխատակազմի անդամներ են: Թվարկված անուններից ենթադրություն կարելի է անել, որ Ռուբեն Հայրապետյանը՝ Նեմեց Ռուբոն, նորից կընտրվի ՀՖՖ նախագահ:

Այս առթիվ վարչապետ Նիկոլ Փաշինյանը իր ուղիղ եթերներից մեկի ժամանակ ասաց.

«Հույս ունեմ, որ այնպիսի ընտրություններ տեղի կունենան, որ ՀՖՖ-ի անդամների ու ընդհանրապես ֆուտբոլասերների «սրտով կլինեն»: Այդ հարցով պետք է զբաղվեն ֆուտբոլի ֆեդերացիայի կազմում գտնվող կազմակերպությունները. մարդիկ, ովքեր այդ ընտրություններին մասնակցելու և քվեարկելու են»:

Ստացվում է, որ վարչապետ Փաշինյանն ապավինում է գործկոմի անդամների արդար ընտրությանը, սակայն մոռանում է, թե ովքեր են այդ մարդիկ, իսկ մինչև վարչապետ դառնալը Փաշինյանն այլ դիտանկյունից էր նայում հարցին:

«Իմ քայլը» շարժման միտինգների ու երթերի ակտիվության պիկում Փաշինյանն այլ կերպ էր արտահայտվում Հայրապետյանի նախագահությանը.

«Ռուբեն Հայրապետյանն իր կուսակցության շեֆի նման խոսքից թռնող է (Խմբ. նկատի ունի Հյարապետյանի հայտարարությունը, թե 2018 թվականի Աշխարհի առաջնության ընտրական փուլը ձախողելու դեպքում հրաժարական կտա), Ռուբեն Հայրապետյան, դու ձախողել ես հայկական ֆուտբոլի զարգացումը, հեռացիր քո խոստմանը համաձայն»:

Հարցից Փաշինյանի մի կողմ քաշվելը, իհարկե, ֆուտբոլասերների աչքից չի կարող վրիպել, բայց հասկանալով հանգմանքը, որ ոչ մի իրավական հենք չունի, որպեսզի կարողանա, այսպես ասած, նախագահ փոխել, կարող է հետաքրքրվել Ռուբեն Հայրապետյանի ֆինանսական ելումուտից:

Ինչպե՞ս է կուտակել հսկայական միջոցներ, ինչքա՞ն խորն են «Հարսնաքարերի» թաքցված սև հաշվապահությունը, և վերջապես՝ ինչպե՞ս է պատահում, որ օդից առկախված լուրերի համաձայն հավաքականի ֆուտբոլիստներն այլ ակումբներից ստացված եկամուտից բաժին են հանում Ռուբեն Հայրապետյանին և իր որդուն` Ռաֆիկ Հայրապետյանին:

Ամենը հաշվի առնելով՝ չպետք է թույլ տալ ռեկետով հարստացողը զբաղեցնի այդքան կարևոր աթոռ և ապականի հայկական ֆուտբոլի ապագան:

Իսկ ո՞րը կլինի Փաշինյանի քայլը, դժվար է ասել, բայց պետք է հիշեցնել նրան «Իմ քայլի» ժամանակ այս հարցի վերաբերյալ իր հստակ դիրքորոշումը: